Нэг ийм бичигдээгүй хууль хөлбөмбөгт бий. Дэлхийн аварга шалгаруулах тэмцээнийг зохион байгуулж буй орон нээлтийн тоглолтдоо хэзээ ч хожигддоггүй.
-20 удаагийн ДАШТ-ий түүхийг харвал 14-т нь зохион байгуулагч орон ялж, үлдсэн зургаад нь тэнцсэн байдаг. Жишээлбэл, 1950 оны ДАШТ-аар зохион байгуулагч Бразиль Мексикийг 4:0 харьцаатай буулган авч байлаа.
Тэгвэл энэ удаа ч Бразиль-Хорватын хооронд болсон нээлтийн тоглолтоор зохион байгуулагч орон 3:1-ийн харьцаатай ялалт байгууллаа.
Бразилийн шигшээ багийн бусад ДАШТ-д гаргасан амжилтаас товч дурдвал:
-Хамгийн сүүлийн 12 ДАШТ-ий нээлтийн тоглолтын наймд нь нэг гоол орж байжээ.
-Энэ жил Бразиль 20 дахь ДАШТ-дээ оролцож байна. Хөлбөмбөгийн бүх дэлхийн аваргад оролцож, таван удаа алтан цом авснаараа тус улстай зүйрцэх баг байхгүй билээ.
-Тэд 20 удаа ДАШТ-д оролцохдоо ихэнх тоглолтдоо /67/ хожиж, хамгийн олон буюу 210 гоол оруулсан амжилтаараа мөн нэгдүгээр бичигддэг.
-Сүүлийн есөн ДАШТ-ий статистикаас үзвэл Бразиль найман тэмцээндээ хэсэгтээ тэргүүлсэн байдаг.
-2006 онд Бразиль Хорваттай таарах үед 1-0-оор хожиж байсан билээ.
Түүхэн статистикийг харсан ч, багийнх нь амжилтыг зэрэгцүүлсэн ч энэ удаагийн нээлтийн тоглолтоор Бразиль ялах нь хэзээнээсээ тодорхой байсан гэхэд буруудахгүй биз ээ.
