Өнгөрсөн есдүгээр сард Улаанбаатар хотод болсон даамын дэлхийн аварга шалгаруулах тэмцээнд энэ спортын амьд домог, дэлхийн 13 удаагийн аварга Зоя Голубеваг 13 дахь өрөгт хожиж, шуугиан дэгдээж байсан М.Одгэрэлийг Тайландад болох Азийн аварга шалгаруулах тэмцээнд бэлтгэж байх үеэр нь ярилцлаа. “Хасу Мегастарс” клубийн залуу тамирчин тэрээр саяхан өндөрлөсөн насанд хүрэгчдийн УАШТ-д тэргүүлсэн билээ.
-Юуны түрүүнд шинэхэн улсын аваргад баяр хүргэе?
-Баярлалаа, улсын аварга шалгаруулах тэмцээнд хоёр дахь удаагаа оролцож түрүүллээ. Энэ удаа тэргүүлснээр спортын мастер цолны болзол хангасан.
-Өрсөлдөгчид хүчтэй байв уу?
-Энэ жилийн улсын аварга шалгаруулах тэмцээн өрсөлдөөнтэй сайхан боллоо. Жил ирэх тусам тэмцээн зохион байгуулалт сайжирч, оролцох тамирчдын тоо нэмэгдсээр байгаа. Тэмцээний шагнал ч гэсэн өндөр болсон. УАШТ-д оролцсон ихэнх тамирчин спортын мастер, дэд мастер цолтой байлаа. Би 11 өрөг тоглосноос долоо хожиж, дөрөв тэнцсэн. Тэмцээн дуусахаас нэг өдрийн өмнө тэргүүлэх болзлоо хангасан. Энэ тэмцээний 10 дахь өрөгт спортын мастер Б.Нандинцэцэгтэй хийсэн тоглолт л хамгийн хүнд байлаа.
-Улсын аваргад тэргүүлсэн тамирчид Азийн аваргад оролцох эрхтэй болсон. Тэмцээндээ хэр бэлтгэж байна?
-Улсын аваргаас алт, мөнгөн медаль авсан тамирчид Тайландад болох Азийн аварга шалгаруулах тэмцээнд оролцохоор бэлтгэлээ базааж байна. Энэ сарын 6-нд Тайландыг зорино. Тэмцээн 10-наас 15-ны хооронд болно. Эмэгтэйчүүдээс спортын мастер Г.Амгалан эгч, спортын мастер Г.Энхтуяа эгч бид гурав явна. Эрэгтэйчүүдээс их мастер Д.Эрдэнэбилэг, М.Ганжаргал их мастер явахаар болсон. Миний хувьд өглөө 9-нөөс 15:00 цаг хүртэл эрчимтэй бэлтгэл хийж байгаа. Бусад цагаар онлайнаар даам тоглоно. Бас өөрийнхөө оролцсон тэмцээнийхээ өргийг үзэж алдаагаа засна даа.
-Сүүлийн үед тамирчид онлайнаар тэмцээнд бэлтгэдэг болж. Онлайнаар тоглох, хүнтэй тоглох хоёрын аль нь үр дүнтэй вэ?
-Би онлайнаар нэг их тоглоод байдаггүй. Онлайнаар тогловол хурдан сэтгэдэг болох байх. Гэхдээ хүнтэй тогловол илүү үр дүнтэй.
