Сүхбаатар аймгийн Соёл, спорт аялал жуулчлалын газрын Биеийн тамир спортын бэлтгэл сургалтын төвийн дарга, МҮОХ-ны гишүүн, дугуйн аяллын “Шилийн богд” клубын тэргүүн, дугуйн спортын мастер Ш.Энх-Амар уг аяллыг санаачлан зохион байгуулж байна.
Тэрбээр 20 жилийн өмнө Монгол орноо дугуйгаар тойрон аялж байжээ. Энэхүү аяллын 20 жилийн ойд зориулсан “Найрамдал-2014” дугуйн аяллын бэлтгэл ажил үндсэндээ хангагджээ.
Аяллын багийнхан ирэх сарын 1-нд уугуул нутаг Баруун-Урт хотын их жанжин Д.Сүхбаатарын талбайгаас гараагаа эхэлж Монгол Улсынхаа нутгаар 2100 км, ОХУ-ын Буриадын нутгаар 1500 км замд дугуйгаар аялах юм. Энэ багт Монгол, Буриадын дугуйчид багтжээ. Монголын талаас багийн орчуулагч, сурталчилгаа хариуцсан ажилтан Н.Гантөмөр, техникч засварчин М.Бямбадорж, залуу тамирчин Б.Тэгшбаяр, Э.Мөнх-Эрдэнэ нар оролцоно. Тэд дугуйн спортоор улсын аварга шалгаруулах тэмцээнээс алт, мөнгөн медаль хүртсэн, холын замд дугуйгаар аялж байсан туршлагатай тамирчид юм.
