Сочигийн олимпын хамгийн сонирхолтой тэмцээний нэг өчигдөр орой эмэгтэй уран гулгагчдын дунд болсон билээ. Эмэгтэйчүүдийн богино хөтөлбөр болон чөлөөт үзүүлбэрийн төрөлд олимпын аварга шалгаруулах уг тэмцээнд Оросын тамирчин А.Сотникова 224,59 оноогоор тэргүүлж, алтан медалийн эзэн болсон бол Ванкуверийн олимпын аварга, мөсний хатан хаан гэгддэг Өмнөд Солонгосын Ким Юна 219,11 оноогоор мөнгөн медалийн эзэн болсон.
Тэдний үзүүлбэрийг жирийн үзэгчийн нүдээр харвал хоёул өөгүй сайхан тоглолт үзүүлсэн боловч шүүгчдийн өгсөн оноонд бүтэн таван баллын зөрүү гарсан билээ. Мэдээж энэ нь мэргэжлийн маш нарийн техник, шалгуураар тогтоосон оноо. Харин чухам юугаараа Оросын уран гулгагч илүү байсан бэ гэдгийг АНУ-ын уран гулгалтын багийн техникийн шинжээч, дасгалжуулагч Адам Лейб мэргэжлийн үүднээс ингэж тайлбарлажээ.

Гурвалсан-давхар эргэлтийн комбинац

Сотниковагийн хийхээр сонгосон гурвалсан-давхар эргэлтийн комбинац бол хамгийн хүнд үсрэлтэд тооцогддог аж. Тэрээр үсрэлтийн өндөр, зай, маш уян налархай урссан хөдөлгөөнөөрөө энэ элемент дээр дээд оноо авсны зэрэгцээ үзүүлбэрийнхээ сүүлийн хагаст гүйцэтгэснээрээ нэмэлт 10 хувийн бонус оноо авсан байна.

Харин Ким Юнагийн үзүүлсэн үсрэлт бол А.Сотниковагийнхтай харьцуулбал хялбартаа тооцогддог учраас түүнээс бага үнэлгээ авсан байна. Энэ үсрэлтийн оролт нь энгийн, буухдаа ч бага хурдтай газарддаг аж.

Элемент                                      А.Сотникова         К.Юна       Онооны зөрүү

Гурвалсан-давхар хослол                         9.94           6.50           +3.44

Хөлийн ажиллагаа                                    5.60           4.44           +1.16

Налуу эргэлт                                           3.77            3.04          +0.73

Гурван үсрэлтийн комбинац                     8.34            7.83           +0.51

Хөл солих  эргэлтийн комбинац               4.71            4.21           +0.50

Гурвалсан сальчов                                  5.82            5.52          +0.30

Гурвалсан эргэлт                                    6.80            6.50           +0.30

Дабл аксель                                           4.70             4.42          +0.28

Нисэлттэй комбинац эргэлт                    4.56             4.43           +0.13


Хөлийн ажиллагаа болон налуу эргэлт гэсэн хоёр элемент дээр Сотниковагийн чадвар дөрөвдүгээр түвшний байсан бол Ким Юна гуравдугаар түвшинд байжээ. Энэ нь дээрх хоёр элемент дээр л гэхэд Ким Юна бараг нэг оноо дутуу авсан гэсэн үг. Сотникова налуу эргэлтийг хийж байх үедээ байрлалаа солихдоо хурдаа сааруулахгүйгээр эрчимтэй хийж чадсан учраас шүүгчид түүнд өндөр оноо өгсөн байна. Энэ мэт шалтгаанаар Ким Юна хоёр ч эргэлтийн элемент дээр өрсөлдөгчөөсөө хоёр оноо дутуу авчээ.