Удахгүй болох гэж буй Сочигийн өвлийн олимпын наадмын аюулгүй байдлыг сахиулж, болзошгүй террорист халдлагаас урьдчилан сэргийлэхэд туслахаар АНУ-ын Холбооны тагнан мөрдөх товчоо (ХТМТ) хэдэн арван албан хаагчаа ОХУ руу илгээж байна.
"20 орчим тагнуулч болон бусад албан хаагчийг Москва руу илгээнэ. 10 гаруй албан хаагчаа ирэх сарын 7-23-нд өвлийн олимпын наадмыг зохион байгуулах Хар тэнгисийн эргийн амралт сувиллын Сочи хотод байрлуулна" гэж ХТМТ-ны захирал Жеймс Корни хэллээ. Мөн түүний хэлснээр, албан хаагчдын зарим нь Сочид хэдийнээ очжээ.
"Аливаа олимпын наадмын аюулгүй байдлыг сахиулна гэдэг асар том ажил" гэж тэрбээр хэлэв.
Манай агентлаг ОХУ-д туслах ч энэ олимпын наадмын аюулгүй байдлыг хангах нь эцэстээ Москвагийн үүрэг гэж ХТМТ-ны тэргүүн хэлээд, ОХУ олимпын наадмыг аюулгүй зохион байгуулна гэдэгт итгэлтэй буйгаа илэрхийллээ.
Өнгөрсөн сард Оросын Волгоград хотын галт тэрэгний төв буудал болон троллейбусанд амиа золиослогч хоёр этгээд халдлага үйлдсэний улмаас 34 хүн амь үрэгдэж, 100 гаруй хүн шархадсаны дараа Сочид аюулгүй байдлыг чангатгаж эхэлсэн юм. Волгоград нь Сочигоос 630 км-ын зайтай байдаг.
Волгоградын халдлагуудын хариуцлагыг ямар нэг бүлэглэл хүлээгээгүй ч Умард Кавказын бүс нутгийн босогчид үйлдсэн байж болзошгүй гэж Оросын тусгай албаныхан үзэж байгаа билээ.
