Өмнөд Африкийн Ерөнхийлөгч асан, арьс өнгөөр ялгаварлах үзлийн эсрэг тэмцэгч Нельсон Мандела таалал төгссөнд эмгэнэн гашуудсан төр засгийн тэргүүн, урлаг соёлын алдартнуудыг мэдэгдэл тасрахгүй үргэлжилсээр байна. Реалити шоуны од Парис Хилтон ч бас эмгэнэл илэрхийлэгсдийн эгнээнд багтсан боловч харамсалтай нь тэрээр Нельсон Мандела гэж яг хэн болохыг мэдэж байсан уу гэдэг олон хүнийг эргэлзүүлж орхив. Учир нь, Н.Мандела таалал төгссөн мэдээ гарсны дараахан түүний албан ёсны Твиттерээр "Тайван нойрс доо, Нельсон Мандела. Таны "Надад мөрөөдөл бий" илтгэл урам зориг бадраамаар. Гайхамшигтай эр" гэсэн жиргээ цацагдсан юм. Парис Хилтон Н.Манделаг Мартин Лютер Кингтэй андуурсан бололтой. Гэвч ийм ичгэвтэр алдаа гарсныг мэдмэгцээ жиргээг устгасан бололтой. Үүний дараахан дээрх жиргээг Парис Хилтон бичээгүй, тэр үед тэрээр онгоцонд явж байсан, онгоцноос буумагцаа энэ тухай олж мэдсэн хэмээн дахин Твиттерээр учирлаж, "Надад мөрөөдөл бий" илтгэлийг Мартин Лютер Кингийнх гэдгийг хэн ч мэднэ хэмээн тайлбар хийжээ. 
