“Монгол туургатан” хүүх­дийн дөрөвдүгээр их наад­мын анхны тэмцээн болох чөлөөт бөхийн барилдаан өчигдөр боллоо. Монгол Улсын гавьяат дасгалжуулагч, хүүхдийн спортын их наадмыг санаачлагч Ч.Наранбаатар “Хоёр дахь удаагаа зохион байгуулж буй эл тэмцээнийг анх 2009 онд Улаан-Үд хотод болсон чөлөөт бөхийн семинарын үеэр зо­хион байгуулах санал гаргасан юм. Миний саналыг Буриадын спортын хорооны дарга Уивитско Метивич, Өвөрмонголын спорт хариуц­сан дарга Шин Мэй нар дэмжсэнээр өнөөдөр энэ спортыг хөгжүүлэхэд өчүүхэн хувь нэмрээ оруулж байна. Анх спортын дөрвөн төрлөөр зохиогддог байсан эл тэмцээн өдгөө найм болт­лоо өргөжсөн. Энэ удаад багийн спортыг дэмжих зо­рилгоор волейболын спор­тыг нэмж оруулсан. Энэ тэм­цээн ирээдүйн тив, дэл­хийн аваргуудыг  бэлтгэх,  өсвөр үеийнхэнд Монгол туургатны соёл урлагийн их өв санг танилцуулах, сурталч­лах, эзэмшүүлэх, тэдний авьяас чадварыг хөгжүүлэх зорил­готой юм” хэмээн онцолсон. 

Тэмцээнд чөлөөт бөхийн 12-14 насны ангилалд эрэгтэй  42, 54, 69,100 кг, эмэгтэй  38, 46, 56 кг жинд хүч үзэх бөгөөд нэг улсаас дөрвөн тамирчин, зохион байгуулагч орны найман тамирчин хүчээ сорих юм Энэ үеэр 14 насны ангилалд 54 кг жинд барилдаж буй И.Золбоотой ярилцахад “Би гурван жил чөлөөт бөхөөр хичээллэж байна. Энэ тэмцээнд манай тамирчид бэлтгэлээ сайн хангасан учраас амжилт үзүүлнэ гэдэгтээ итгэлтэй байна” хэмээсэн. Энэ тэмцээнд амжилттай барилдсан тамирчид ирэх жил болох “Нанжин 2014” хүүхэд, залуучуудын хоёрдугаар олимпын наадамд оролцох эрх авах юм. Харин зохион байгуулагчдын зүгээс ирэх жил  Халимаг, Тува, Якут зэрэг Монгол туургатан орны спортын байгууллага, холбоотой хамтран ажил­лахаар төлөвлөсөн бай­­­­на. “Монгол туургатан” хүүхдийн дөрөвдүгээр их наадамд Монголын чөлөөт бөхийн холбооны нарийн бичгийн дарга н.Эрдэнэбаатар, Өвөр­монголын өөртөө засах орны спорт хариуцсан дарга Шин Мэй,  Монгол Улсын гавьяат дасгалжуулагч Ч.Наранбаатар, Биеийн тамирын бодлого зохи­цуулалтын газрын даргын үүрэг гүйцэтгэгч Д.Сүрэнхорлоо нар оролцсон юм. Тэмцээний дүн маргааш гарна.