Дахиад л Оюу толгой. Далд уурхайн хөрөнгө оруулалтаа зогсоож, 1700 ажилтнаа халсан шуугиан намжаагүй байна. Гэтэл төрийн өмчит “Эрдэнэс Оюу толгой” ХХК-ийн Төлөөлөн удирдах зөвлөл өчигдөр хуралдаж тус компанийн захирал Ц.Сэдванчигийг албан тушаалаас нь чөлөөллөө. Түүний оронд Да.Ганболдыг томилжээ. Тэрээр өчигдөр ажлаа хүлээж авав. Ц.Сэдванчиг “Рит Тинто”-д далд уурхайн хөрөнгө оруулалтын талаар захидал илгээсэн нь албан тушаалаа өгөх шалтгаан болсон гэнэ. Дашрамд дурдахад, Оюу толгойн далд уурхай санхүүжилтгүй болсноор барилгын ажил нь зогсч олон хүн ажилгүй болсон билээ. “Рио Тинто”-гийн хөрөнгө оруулалтаа зогсоох, ажилчдаа хоморголон халсан энэ үйлдэл нь Хөрөнгө оруулалтын гэрээний үндсэн үүргээсээ татгалзсан гэж үзэх үндэслэлтэй аж. Уг гэрээнд зааснаар Монгол Улсын Засгийн газар дээрх асуудлын талаар “Рио Тинто”-д мэдэгдэл хүргүүлж 60 хоногт алдаагаа засч хариу ирүүлэхгүй бол Хөрөнгө оруулалтын гэрээ хүчингүй болох нь. Энэ нь манай улсын Засгийн газрын уг гэрээгээр зохицуулагдсан онцгой эрх ажээ. Одоо Засгийн газар энэ барьцаа лавшруулаад атгаж чадвал Хөрөнгө оруулалтын гэрээнд өөрчлөлт оруулах боломж бүрдэнэ. Хэрэв чадахгүй бол 15 жилийн хугацаанд гэрээнд өөрчлөлт оруулна хэмээн дуугарах эрхгүй болох юм.
