Бяцхан охид цагаан морь унасан ханхүү мөрөөддөг. Харин Сиенна охин бүр нэг сартайгаасаа л ханхүү “мөрөөдөж эхэлжээ”. Английн жирийн нэг ээж Эми охиндоо “Нэг л өдөр би ханхүү Жоржтой гэрлэнэ” гэсэн бичигтэй хувцас өмсүүлснээ “Facebook” хуудсандаа зургийг нь тавьтал санаандгүйгээр маш олон мянган хүнд тарж, бяцхан охин нь гэнэтхэн л од болжээ. Бяцхан охины зурганд 200 мянган хүн Like дарж, улмаар тэр зургийг ханхүү Харригийн фэн хуудсанд хэн нэгэн нь тавьсны дараа бүр 1,5 сая like цуглуулж дөнгөжээ. Гэхдээ ханхүүгийн фэн хуудас дээрх зургийг харсан хүмүүсийн ихэнх нь бяцхан охиныг Уильям гүнгийнд мэндэлсэн ханхүү өөрөө байна хэмээн андуурчээ.
Уильям гүнгийн гэргий Кэтерин амаржиж, бяцхан ханхүү Жорж мэндэлсний дараа Их Британид энэ баярт үйл явдлыг тохиолдуулан хүүхдийн олон янзын хувцас сэлт, бэлэг дурсгалын зүйл худалдаанд гарсан юм. 
