Дуучин Жастин Бибер өөрийг нь харах гэж хэдэн цаг хүлээж зогссон шүтэн бишрэгч охидоо гомдоохоор муухай үйлдэл гаргажээ. Төрөлх Канадынхаа Торонто хотод тоглолтоо хийхээр ирсэн дуучны байрласан зочид буудлын гадна хэсэг фэнүүд нь ирж, түүнийг харахаар хүлээж зогссон байна. Гэтэл Жастин Бибер найз хөвгүүдийнхээ хамт тагтан дээр гарч ирэн, тэднийг шоолон инээснээр барахгүй дээрээс нь шүлсээ хаяж тавтиргүйтжээ. Тэрээр тагтан дээр зогсч байхдаа зургаа авч, Instagram-д нийтлэхдээ “Өнөө өглөө ингэж сэрлээ. Дэлхий дээрх хамгийн шилдэг фэнүүд” хэмээн бичсэн байсан нь гаргасан авираас нь тэс өөр байв.
Жастин Бибер бусад руу нулимсан нь анхны тохиолдол биш. Энэ сарын эхээр гэхэд АНУ-ын нэгэн DJ-г Жастин Бибер өөрийнх нь зургийг авлаа хэмээн уурлаж, эцэг эхийг нь хүртэл доромжлон, нүүр рүү нь нулимсан хэмээн шуугьсан. Мөн өнгөрсөн нэгдүгээр сард биеийн тамирын дасгалын танхимд тааралдсан бүсгүйн савтай ус руу шүлсээ хаясан гэдэг гомдол гарсан бол өнгөрсөн гуравдугаар сард өөрийнх нь тухай цагдаад гомдол гаргасны төлөө хөршийнхөө нүүр рүү нулимсан явдал ч гарчээ. 
