Засгийн газраас үнэ тогтворжуулах хөтөлбөр хэрэгжүүлж байгаа билээ. Үүний хүрээнд барилгын ам.метрийн үнийг тогтворжуулах зорилго тавьж буй. ШӨХТ-ын дарга О.Магнай ч тэр ам.метр талбайн үнийг нэг сая төгрөгт барих боломж бий хэмээн мэдэгдэж байсан удаатай. Тэгвэл ирэх намраас ам.метр нь нэг сая төгрөгт багтах барилга ашиглалтад орох боломж бүрдсэн гэдгийг ШӨХТГ-ын дарга О.Магнай мэдэгдлээ.
Тэрээр хэлэхдээ “Бидэнд нэг сайн мэдээ байгаагийн нэг нь өнгөрсөн 20 жилийн хугацаанд анх удаа барилгын ам.метр талбайн үнэ буурлаа. Энэ мэдээж төрөөс баримталж байгаа бодлого хэрэгжиж байгаа гэсэн үг. Үүнтэй уялдуулаад Дарханы Хар төмөрлөгийн үйлдвэрийн арматурын үнэ тонн тутамдаа 10 хувиар буурч байна” гэсэн юм.
Дарханы хар төмөрлөгийн үйлдвэрийн дарга М.Сайннямбуу, “Орон сууцны үнийг тогтворжуулах хөтөлбөрийн дагуу барилгын матариалын үнийг бууруулах зорилгоор барилгын материал үйлдвэрлэгч аж ахуйн нэгжүүдэд хөнгөлөлттэй зээлийг олгож байгаа. Энэ арга хэмжээ үр дүнгээ өгч байна. Манай компани арматурынхнаа үнийг энэ сараас эхлэн үнээ 10 хувиар бууруулаад явж байна” гэсэн юм.
Дарханы хар төмөрлөгийн нэг тонн арматурын үнэ 1045000 байсныг 10 хувиар хөнгөлж байгаа аж.
Гэхдээ сүүлийн үед Дарханы хар төмөрлөгийн үйлдвэрийг иргэдээс авдаг хаягдал төмрийнхөө үнийг бууруулаад байгаа гэсэн шүүмжлэл гарах болсон. Үүнд М.Сайннямбуу захирал, “Хаягдал төмөр маань арматурын гол түүхий эд нь мөн. Намайг энэ ажлыг авахад хаягдал төмрийн үнэ нэг тонн нь 60 мянга байсан бол бид 300 орчим мянган төгрөг болгосон. Бид хоёр хаягдал төмрөө авахдаа хоёр янзаар авдаг. Нэг нь Дарханы хар төмөрлөгийн үйлдвэр дээрээ авдаг бол нөгөө нь Улаанбаатар төлөөлөгчийн газар дээр авдаг. Улаанбаатар төлөөлөгчийн газар дээр авсан хаягдал төмрөө үйлдвэр рүү тээвэрлэдэг учраас үнийг нь зөрүүтэй авдаг. Үнийг бид тогтоодоггүй, зах зээл тогтоогддог. Тиймээс арматурын үнийг бууруулж байгаа болохоор хаягдал төмрийнхөө үнийг бууруулж авахаар болсон. Гэхдээ Дарханы төмөрлөгийн үйлдвэр дээрээ 275 мянга, Улаанбаатар төлөөлөгчийн газар дээр 245 мянган төгрөгөөр авч байна” гэлээ.
Дархан төмөрлөгийн үйлдвэрийн хувьд жилд 60 орчим мянган тонн арматур төмөр үйлдвэрлэж, монголын хэрэгцээний 30 орчим хувийг хангадаг байна. Цаашид хаягдал төмрөөс гадна, төмрийн хүдрээс түүхий эдээ авах аж.
Мөн Засгийн газраас үнэ тогтворжуулах хөтөлбөрийн хүрээнд 10 тэрбум төгрөгийн зээл авсан байна.