Солонгосын кино жүжигчин Сон Хо Ён өнөө өглөө машин дотроо амиа хорлох гэж оролдсоныг хажуугаар явсан хүн харж, тусламж дуудсанаар аварч чаджээ. Сон Хо Ёны найз бүсгүй гурав хоногийн өмнө амиа егүүтгэж нас барсан нь жүжигчин залууг ийм үйлдэл хийхэд хүргэжээ. Түүний найз бүсгүй машиндаа эм ууж, хийнд хордон амиа хорлохдоо “Би өр зээлэндээ маш их санаа зовж байна”, “Сон Хо Ён миний сэтгэлийг гонсойлголоо” гэсэн үгс бичиж үлдээсэн байжээ. Тиймээс бүсгүйн амиа хорлох болсон шалтгаан юу болохыг тогтоохоор цагдаагийнхан жүжигчин залуугаас мэдүүлэг авсны дээр гэр бүлийнхэн нь түүнийг охиныхоо үхэлд буруутгаж байгаа аж.

Тийм ч учраас гэнэтийн цочрол орсон жүжигчин найз бүсгүйтэйгээ яг ижил аргаар амиа хорлохыг оролдож, Сөүлийн нэгэн авто зогсоолд машинаа тавиад дотор нь хий тавьсны улмаас гал авалцсан байна. Харин энэ бүхнийг харсан гэрч тусламж дуудсанаар жүжигчний амь насанд аюул учрахаас өмнө машинаас нь гаргажээ. Эх сурвалжуудын мэдээлж буйгаар энэ бүх явдал болохоос өмнө Сон Хо Ёны хэтэрхий завгүй ажлын хуваариас болж хос хоёр бага зэрэг муудалцсан байжээ.