Фатима Хадуева Магомедовна бол Оросын зөн билгийн тулаан тэмцээний хамгийн хүчтэй өрсөлдөгчдийн нэг. Дагестан гаралтай энэ бүсгүй монголд хоёрхон хоног саатахдаа Монголын Ерөнхийлөгчийн сонгуулийн дүнг үндсэндээ зарлачихаад явж байгаа бололтой. Эрх мэдэл бүхий хариуцлага өндөртай, залуу сэтгэлгээтэй, галын энергитэй хүн энэ удаагийн Ерөнхийлөгчөөр сонгогдоно хэмээн түүний зөгнөсөн нь хэнийг хэлсэн бэ гэдэг ерөнхийдөө тодорхой байгаа юм.

Фатима бол сэтгүүлч, сэтгэлзүйч мэргэжилтэй. Хэд хэдэн буяны санг өөрөө удирддаг. 1972 онд төрсөн “Дорнын нууцлаг эмэгтэй” хэмээн зөн билгийн тулааны үеэр олон хүний сонирхлыг татаж байсан энэ бүсгүй Кавказын халуун цэгүүдэд ажиллаж, амьдарч байсан гэдэг.

Тэрээр хүүхэд байхдаа л зөн билэгтэн гэдгээ мэдэрч байсан ч Кавказад болсон аймшигт олон халдлагаас өмнө энэ мэдрэмжээ ашиглана гэж төдийлэн боддоггүй байж. Гэвч Дагестанд хэзээ хаана ямар дэлбэрэлт болох нь, хэний хүүхдийг, хэнийг  барьцаалах нь гэдгийг мэдэрч эхэлснээр өөрийн чадвараа ашиглах болсон гэнэ. Тэрээр их зөөлөн цагаан энергитэй учраас хүн бүрт өөрийнхөө чадлаар туслахыг хичээдэг.

Тэрээр хоёр охинтой. Том нь их сургуульд бага нь дунд сургуульд сурдаг.  Тэрээр өөрийн эгчийн хүүг өргөж авсан. Охин нь мөгөөрсөн хоолойн өрөвсөлтэй байсан ч  эмч нарын буруугаас үхэл амьдралын заагт ирж, эмчилгээнд зарцуулах багагүй мөнгийг олох гэж зүдэрсний эцэст тэрээр өвчтэй хүүхдүүдэд туслах буяны сан байгуулж ажиллах болжээ.

 Өөрийнхөө хүчийг зовлон туулсан, зовлонд унасан олон хүнд харамгүй зориулж чаддагаараа тэр бусдаас ялгардаг юм.