Хөдөлмөрийн яамнаас ажил олгогчдын эрэлт хэрэгцээнд тулгуурлан “Үндэсний мэргэжилтэй ажилтан бэлтгэх хөтөлбөр”-ийг хэрэгжүүлж байна. Тус хөтөлбөрийн эхний ээлжийн 4827 суралцагчид танхимын сургалтаа дуусгаж, дадлагын хичээлдээ орох болсон энэ үед хоёрдугаар ээлжийн суралцагчид хичээлдээ орж байгаа юм. Тиймээс эхний ээлжийн танхимын сургалтын төгсөлт, хоёрдугаар ээлжийн хичээлийн нээлтийг Хөдөлмөрийн яамнаас нэгдсэн арга хэмжээ болгон энэ амралтын өдрүүдэд “Буянт ухаа” спорт цогцолборт зохион байгуулах юм байна. Тус арга хэмжээний хүрээнд хот, хөдөөгийн МСҮ-ийн 50 төвд суралцаж байгаа бүх суралцагчид Улаанбаатар хотноо хүрэлцэн ирээд байгаа юм.
Өнөөдрийн байдлаар хөдөө орон нутгийн 33 МСҮТ-өөс 3340 суралцагч нийслэл хотод ирж үндэсний томоохон үйлдвэрийн газруудтай танилцаж, Төрийн түүхийн музейг сонирхох аж. Засгийн газраас мэргэжилтэй ажилтан бэлтгэхэд анхаарч, цаашид монгол орныхоо бүтээн байгуулалтын гол хүч нь монгол хүн өөрөө гэсэн ойлголтыг суралцагчдад өгөх зорилготойгоор тус арга хэмжээг зохион байгуулж байгаа. Тиймээс энэ жилийн хувьд 6600 мэргэжилтэй ажилтан бэлтгэж, ажлын байртай, ажилтай орлоготой болгох зорилготой тус хөтөлбөр ийнхүү амжилттай зохион байгуулагдаж, хоёрдугаар ээлжийн суралцагчдаа хүлээн авахад бэлэн боллоо.
