Хууль зүйн сайд Х.Тэмүүжин тушаал гаргаж цагдаагийн байгууллагаас авдаг лавлагааг хэрэгсэхгүй болгохоор шийдвэрлэлээ. Ажилд орох, виз мэдүүлэх, банк санхүүгийн болон зээлд хамрагдах бүрт л цагдаагийн тодорхойлолт шаарддаг. Энэ нь хүний эрхийг ноцтойгоор зөрчсөн явдал гэж Х.Тэмүүжин сайд үзэж ийнхүү тушаал гаргажээ. Ялангуяа, хийсэн хэргийнхээ хариуцлагыг хүлээгээд зохих шийтгэлээ эдлээд гарсан хүнийг давхар яллаж, нийгэмд гадуурхахгүйн тулд цагдаагийн байгууллагаас шаарддаг тэр лавлагааг хүчингүй болгожээ. Судалгаагаар цагдаагийн байгууллага өдөрт дунджаар 800 орчим иргэнд өмнө нь ямар нэгэн ял шийтгэл эдэлж байсан эсэх лавлагаа өгдөг байна. Үүний 70 гаруй хувь нь ажил хөдөлмөр эрхлэх, 25 орчим хувь нь гадаадад явахаар виз хүсэх материал бүрдүүлэх, үлдсэн хувь нь бусад зорилгоор авдаг аж. Тухайн байгууллага нь шаардлагатай гэж үзээд шинээр ажилд орох иргэний талаар лавлагаа авахаар албан бичиг явуулснаар хариултаа авч болох гэнэ.
