Цас, бороотой үед автомашин жолоодохдоо техникийн бүрэн байдалд анхаарал тавьж, замын хөдөлгөөнд оролцохдоо хурдаа тохируулж яваарай. Жолоо барьж буй хүмүүс дараах зүйлсийг анхаарахыг зөвлөж байна.

Шил арчигч болон шил арчигчийн шингэнийг тогтмол шалгаж, шаардлагатай бол сольж байгаарай. Бороо, цастай үед үзэгдэх орчин хязгаарлагдмал болдог ба шил арчигч чухал үүрэгтэй байдаг.

Огцом тормослох, огцом жолооны хүрдээ мушгих болон огцом хааз өгч болохгүй. Учир нь халтиргаа гулгаатай үед эдгээр үйлдэл нь таныг эрсдэлд оруулдаг.

Халтиргаа гулгаа ихтэй замд аль болох хүнд араагаар явах нь аливаа эрсдлээс урьдчилан сэргийлэхэд тустай.

Өгсүүр замд автомашины хурдыг нэгэн жигд барих нь чухал. Хүч алдуулсан тохиолдолд автомашин хий эргэж гулгах аюулд хүргэдэг.

Эргэлт болон тойрог хөдөлгөөн хийхдээ хурдаа хасаарай. Ингэснээр эгнээнээсээ халихгүй байх нөхцөл бүрдэнэ.

Гулгаатай замаар уруудахдаа тормосыг аль болох бага багаар гишгэж зууруулах байдлаар буух шаардлагатай бөгөөд энэ үед хурдны хайрцагны арааг аль болох хүнд араанд шилжүүлэх шаардлагатай.

Тээврийн хэрэгсэл халтирч гулгасан тохиолдолд гулгасан талруу жолооны хүрдийг эргүүлж автомашины тэнцвэрийг олох шаардлагатай.

Тээврийн хэрэгслийн хоорондын зайг барьж явах нь учирч болох эрсдэлээс урьдчилан сэргийлнэ.

Дугуйн даралтыг норм стандартын дагуу хийлсэн байх, хэт сул эсвэл хэт чанга байж болохгүй.

Автомашины хүндийн жинг тэнцүү хувиарлах, тэнцүү хувиарлаагүй тохиолдолд бөгсөө хаях, хүрд булаах зэрэг асуудлууд үүсдэг.