“Нийтийн хөлбөмбөг” төслийн хүрээнд Улаанбаатар хотын аварга шалгаруулах "UB CUP 2022” хөлбөмбөгийн тэмцээнийг энэ сарын 8-нд Сүхбаатарын талбайд зохион байгуулна. Хотын аварга шалгаруулах тэмцээнийг анх удаа Сүхбаатарын талбайд зохион байгуулах бөгөөд төв талбайд 90X45 харьцаатай хөл бөмбөгийн талбай байгуулах юм. .
Улаанбаатар хотын аварга шалгаруулах тэмцээнд нийслэл есөн дүүргийн шигшээ багууд оролцоно. Одоогоор Баянгол, Сүхбаатар, Сонгинохайрхан, Хан-Уул, Чингэлтэй дүүрэг бүртгүүлээд байна. Тэмцээний техникийн зөвлөгөөн энэ сарын 5-нд Монголын хөлбөмбөгийн холбооны байранд болж, оролцох багууд тодорхой болох юм. Аваргын цомыг хүртсэн дүүргийн шигшээ баг Увс аймгийн Улаангом суманд болох 21 аймгийн аварга шалгаруулах тэмцээний дээд шатанд түрүүлсэн аймгийн шигшээ багтай үндэсний цомын төлөөх финалын нэг тоглолт хийнэ.
