УИХ дахь Ардчилсан намын бүлэг өнөөдөр /2021.03.11/ ээлжит бус хурлынхаа үеэр Ардчилсан намын даргад нэр дэвшигч О.Цогтгэрэлд баяр хүргэн, амжилт хүсэж, бэлгэдэл болгон төрийн далбаа, намын тугаа дурсгав. Энэ үеэр УИХ-ын гишүүн, Ардчилсан намын даргад нэр дэвшигч О.Цогтгэрэл, Ардчилсан намын энэ түүхэн хүнд цаг үед намынхаа талд, мянга мянган гишүүд, ардчилалд хайртай иргэдийнхээ төлөө зарчимтай өрсөлдөхөө амлаж байна гэв.

Харин Ардчилсан намын бүлгийн дарга Д.Ганбат, Ардчилсан нам хүнд цаг үеийг туулан, дараагийн шатны түүхээ бичиж эхэлж байна. Ардчилсан намын даргын сонгуульд нэр дэвшин, хариуцлага үүрэн ажиллахаа илэрхийлсэн хоёр гишүүндээ талархаж байна. Эв нэгдлийг илэрхийлж нэрээ татсан Ж.Батсуурь гишүүний санаачилгаар Ардчилсан намын бүлэг нэр дэвшигч О.Цогтгэрэлийг дэмжин ажиллахаа илэрхийлж байна. Намын даргын сонгуульд нэр дэвших болзлоо хангасан намынхаа бусад нэр дэвшигч залуусдаа амжилт хүсэв.