Мандах их сургуулиас хөгжлийн бэрхшээлтэй оюутныг элсүүлэх, сургах чиглэлээр хамтран ажиллах хүсэлт тавьсны дагуу Хөдөлмөр нийгмийн хамгааллын яамны хүн амын хөгжлийн газрын дарга С.Тунгалагтамир, ХБИ-ийн хөгжлийн хэлтсийн дарга С.Рэгзэн, ХБХХЕГ-ын дарга Ц.Ганчимэг болон холбогдох мэргэжилтнүүд тус сургуулийн үйл ажиллагаа болон дэд бүтцийн хүртээмжтэй танилцлаа.

Мандах их сургууль нь 1992 оноос эхлэн үйл ажиллагаа явуулж эхэлсэн бөгөөд Мэдээллийн технологийн сургууль болон Дархан-Уул аймагт салбар сургуультай. 2018 онд олон улсын барилга байгууламжийн стандартыг хангасан хичээлийн байрыг шинээр ашиглалтад оруулжээ. Ингэхдээ хөгжлийн бэрхшээлтэй залуусын суралцах хүсэл эрмэлзэл дэд бүтцийн хүртээмжгүйн улмаас хязгаарлагдаж байгааг анхааралдаа авч, энэ асуудлыг шийдвэрлэсэн байна.

Тодруулбал, тулгуур эрхтний бэрхшээлтэй, хөдөлгөөний бэрхшээлтэй суралцагчдад хүртээмжийг хангасан налуу зам, шатны бариул, давхар бүрд зориулалтын ариун цэврийн өрөөг бүрэн тохижуулжээ. Тус их сургуулийн захирал Г.Нанжид дэд бүтцийн хүртээмжийг хангасан тул 1-2 дугаар дамжааны оюутнууд шилжин ирж суралцах боломжтой гэдгийг онцлон тэмдэглэв.

Мандах их сургууль нь 2018 онд бакалаврын болон магистрын хөтөлбөрүүдээ үндэсний болон олон улсын байгууллагаар магадлан итгэмжлэгдсэн анхны сургууль болсон байна. Цаашид Хөдөлмөр, нийгмийн хамгааллын яам тус сургуулийг хөгжлийн бэрхшээлтэй хүнд ээлтэй жишиг сургууль болгоход хамтран ажиллахаар боллоо.