“Нандин нас” киноны гол дүр болох Ука буюу Б.Энхриймаатай ярилцсанаа уншигч танд хүргэе.

-Юуны өмнө манай уншигчдад өөрийгөө танилцуулахгүй юу?

-“Сайн байцгаана уу. Энэ өдрийн мэнд хүргэе. Намайг Энхриймаа гэдэг. Би энэ жил 18 нас хүрч байгаа. Эрдмийн ундраа цогцолбор сургуульд сурдаг.  Мөн Төгс хөгжил продакшинд жүжигчнээр суралцдаг байгаа. Эцэг, эхээс хоёулаа. Хөөрхөн охин дүүтэй.

-Төгс хөгжил продакшнд ороод хэр удаж байгаа вэ?

-Продакшндаа ороод 6 дахь жилдээ амжилттай суралцаж явна. Ерөөсөө жүжигчин болно гэсэн бодол байгаагүй ээ, мэс заслын эмч болно гэж боддог байлаа. Зуны амралтаар гэр бүлээрээ Хануй рашаан явж амардаг байсан юм. Нэг удаа явж ирсний маргааш нь ээж “Чамайг жүжгийн дугуйланд оруулсан” гэж хэлдэг байгаа.  Тухайн үед жаахан дурамчхан хүлээж авсан ч ээжийгээ дагаад  Буянтөгс багш дээрээ очсон доо. Багш маань “Ямар жаахан хүүхэд шиг царайтай юм бэ” гэж хэлээд намайг хүлээж авч байлаа.

-Продакшнд орсноосоо хойш хэр их юм сурч мэдэж авав?

-Өмнө нь эмээ өвөөгийн эрх хүүхэд байсан. Харин энд орж ирээд өөрийн гэсэн хүсэл мөрөөдөлдөө бат зогсож, хэлсэн үгэндээ ч хүрч чаддаг болсон.  Мөн би цаг барина гэж ёстой мэддэггүй хүүхэд байсан чинь энд орж ирээд утгаар нь цаг барьж сурсан. Энд надад ганц жүжиг, бүжиг гэлтгүй хүмүүжлийн хичээл хүртэл зааж байна.  Найруулагч маань бүх хүүхдийг өөрийнхөө хүүхдүүдээс илүү анхаардаг. Анх орж ирэхдээ би бүжиглэвэл бүжиглээд жүжиглэвэл жүжиглэнэ гэж боддог байсан. Гэтэл үеийнхээ хүүхдүүд дунд орсон чинь адилхан л байдаг юм байна лээ. Харин сайн дуулж чадахгүй дээ, дуулахгүй гэж бодож байтал Бүжээрэй дууны клип хийнэ гээд хоолой шалгаж үзсэн. Тэгэхэд “гоё хоолойтой юм байна” гэхэд нь их баярлаж билээ. Эндээс сурч мэдсэн зүйл олон. Одоо ч сурч л явна. Багш минь хэзээ ч мартагдахгүй их тэсвэр хатуужил, хэнээр ч орлохгүй сайн найз нөхөд,  хамт олон,  гайхалтай хүмүүжлийг суулгаж өгсөн юм шүү.

-Энэ хугацаанд ямар уран бүтээлүүдэд оролцсон байх юм?

-Анх орж ирээд Бүжээрэй дууны клипэнд тоглож байлаа. Тэгээд цаашлаад Хайрын Зуслан ОАУСК, Адал явдалт аялал ОАУСК, Үхлийн зугаалга УСК, Хүсээгүй үнсэлт УСК, Нандин нас ОАУСК гэх мэт кинонд гол болон туслах дүр бүтээсэн. Мөн зарим нэг контентуудад орж байсан.

 -Их л мэрийж хөдөлмөрлөж дээ?

 -Мэдээж тэгэлгүй яахав. Миний урд маш том үүрэг зорилго байгаа.  Үүнийгээ биелүүлэхийн төлөө тууштай явна.  Миний ард баттай зогсож, үргэлж дэмжиж, тусалж байдаг ээж, аав, эмээ, эгч, ах нар гээд олон хүн бий.

-Шантрах үе цөөнгүй гардаг байсан байх. Тэр үедээ яаж өөрийгөө зоригжуулдаг байв?

-Яахав хааяа шантрах үе гардаг.  Эхний жилүүдэд хамгийн их шүүмжлэл хүртдэг байсан байх шүү. Тэр үед надад ээж, багш 2 минь их дэмжлэг үзүүлээд эргээд л босгодог байсан даа.

-“Чөлөөт цагаа хэрхэн өнгөрүүлдэг вэ?

-Бүжгээ бэлдэхээс гадна сонин хачин зүйлсийг их судалдаг байсан. Харин одоо ЭЕШ-даа бэлдэж байгаа. Мөн “Нандин нас 2” киноныхоо бэлтгэлд орсон байгаа болохоор чөлөөт цаг багатай байгаа.

-“Нандин нас 1”-д тоглосноор шүүмжлэл, магтаалыг зэрэг сонссон байх. Энэ талаарх өөрийн тань бодол?

-Аливаа юманд нэмэх, хасах гэж байдаг шүү дээ. Шүүмжлэл магтаал аль аль нь байх хэрэгтэй болов уу. Эерэг сэтгэгдэл сонсож баярладаг бол шүүмж сонсож өөрийнхөө гаргасан алдааг засаад явдаг. Тиймээс хоёуланг нь сонсох дуртай.