Нийслэлийн иргэдийн төлөөлөгчдийн хурлаас баталсан “Түгжрэлгүй Улаанбаатар” төслийн хүрээнд замын хөдөлгөөнд оролцох тээврийн хэрэгслүүдийг улсын дугаарын сүүлийн тоогоор нь хязгаарлахаар болсон. Өөрөөр хэлбэл авто машиныхаа дугаарын сүүлийн тооноос хамааран долоо хоногийн ажлын өдрүүдийн аль нэг гаригт нь тээврийн хэрэгсэлгүй зорчих ёстой болоод байгаа. Улаанбаатарын замын нягтрал хөдөлгөөнийг 20 хувиар сааруулах зорилготой эл хөтөлбөр маргаашаас эхлэн хэрэгжих тул жолооч танд долоо хоногийн аль өдөр машингүй явах ёстойг тань сануулъя. Хэрэв таны машины улсын дугаар 1,6-аар төгссөн бол даваа гариг, 2,7-гоор төгссөн бол мягмар, 3,8-аар дууссан бол лхагва гаригт машингүй явах нь. Харин 4,9-өөр төгссөн бол пүрэв, 5,0-оор төгссөн бол баасан гаригт машингүй өнжих нь. Гэхдээ энэ хөтөлбөр аравдугаар сарын 25 хүртэл үргэлжлэх учир жолооч нарын тав тухыг  тийм ч удаан алдагдуулахгүй.  
Зүүн дөрвөн замын уулзвараас баруун дөрвөн замын уулзвар хүртэл 3,48 киломер урттай хэсэг нь хамгийн их түгжрэл үүсдэг замын нэг. Тийм ч учраас долоо хоногийн ажлын өдрүүдэд 08.00-22.00 цагийн хооронд Их тойруу дотор, Нарны замаас хойшхи хэсэгт улсын дугаарын дагуу замын хөдөлгөөнд оролцохыг хязгаарлаж байгаа юм.