ОХУ-ын Екатеринбург хотын "Екатеринбург Экспо" ордонд сонирхогчдын боксын 20 дахь удаагийн Дэлхийн аварга шалгаруулах тэмцээн өчигдөр нээлтээ хийсэн билээ. Хоёр жил тутам зохиогддог ДАШТ-д энэ жил 78 орны 365 тамирчин оролцож буй аж.
Монголын тамирчдаас:
52 кг-ын жинд 41 боксчин оролцоно. Манай тамирчин Х.Энхмандах эхний тойрогт хийлж дараагийн тойрогт есдүгээр сарын 14-ний өдөр Казахстаны С.Бибоссиновтой тулалдана.
57 кг-ын жинд 51 тамирчин сугалаанд орж, манай Э.Цэндбаатар эхлээд гоц мөргөж дараа нь есдүгээр сарын 15-нд Кыргызстан-Беларусийн боксчдын ялсантай тулалдана.
63 кг-д хамгийн олон буюу 53 боксчин өрсөлдөж байна. Энэ жинд манай шилдэг боксчин ОУХМ Б.Чинзориг есдүгээр сарын 14-нд БНХАУ-Палестиний ялсантай тулалдана.
69 кг-ын жинд 51 тамирчин байна. Манайхаас Г.Баярхүү эхний тойрогт хийлсан. Хоёрдугаар тойргийн тулаанаа 9 сарын 16-нд хийнэ.
75 кг-ын жинд Д.Давааням Узбекистаны Ф.Кахрамоновтой тулалдана. Энэ тулаанд ялалт байгуулбал манай тамирчин дараагийн тойрогт Австрийн А.Каммаранотой таарна.
81 кг-ын жинд нийт 49 тамирчин сугалаанд оролцож ОУХМ Н. Шинэбаяр эхний тойрогт Узбекистаны Д.Рузметовтой учраа таарсан бөгөөд есдүгээр сарын 10-нд рингэнд гарна.
91 кг-ын жинд 42 боксчин байна. Манайхаас ОХУМ С.Эрдэнэбаяр эхний тойрогт Словакын Д.Михалектай оноолт таарчээ.
