Уран бүтээлч Т.Хулангийн санаачилгаар Joroikhulan арт нэгдэл 2017 онд байгуулагджээ. Энэхүү арт нэгдэл нь 11 уран бүтээлчдийн урлан, үзэсгэлэнгийн танхим, арт дэлгүүр, уран зургийн сургалтын танхимтай бөгөөд уран бүтээлчид бие биенээ дэмжиж хамтдаа хөгжих зорилгоор байгуулагдсан аж. Joroikhulan арт галерейд долоо хоног тутамд урлангийн гишүүн уран бүтээлчдийн өөр өөрсдийн чиглэлийн сургалт, хэлэлцүүлэг, урлаг сонирхогчдод зориулсан арт кино өдөрлөг, хүүхдүүдэд зориулсан уран зургийн сургалт, яруу найргийн өдөрлөг, хөгжмийн өдөрлөг гэх мэт олон үйл ажиллагааг зохион байгуулсаар иржээ. Аль ч цаг үеийн дүрслэх урлагийн уран бүтээлчдэд тулгардаг зүйл бол уран бүтээлээ туурвих орон зай маш чухал байдаг. Тэгвэд нийгмийн дэмжлэг харилцаа хүнд хэцүү үеийг хамтдаа туулан ертөнцийн дотоод мөн чанарыг танин мэдрүүлэхээр хамтран урагшилж буй залуу уран бүтээлчид анхны бие даасан “АРВАН НЭГ” үзэсгэлэнгээ өчигдөр нээв. Тус үзэсгэлэнд 11 уран бүтээлчийн график, комик, уран зураг, илустрэшн, монгол зургийн төрлөөр бүтээгдсэн 20 гаруй бүтээл дэлгэгджээ. Ирэх сарын 15-ныг хүртэл үзэгчдийн мэлмийг баясгах үзэсгэлэнг сонирхохыг хүсвэл та Олимп хотхоны 424 байрны 1-р орцны 4 тоотод очиход л хангалттай.