Дархан-Уул аймгийн Засаг дарга С.Насанбат хууль зөрчиж, ашиг сонирхлын зөрчилтэй этгээдийг албан тушаалд томилсон талаар АТГ-аас мэдээллээ.
“Дархан-Хот байгуулалт, барилга захиалагчийн газар” орон нутгийн өмчит аж ахуйн тооцоот үйлдвэрийн газрын даргаар Д.Элдэвсайхан гэгч нэр дэвшсэн юм байна. Түүний мэдүүлгийг АТГ хянаад, “тухайн албан үүргийг хэрэгжүүлэхэд илт ашиг сонирхлын зөрчил үүснэ” гэж үзжээ. Улмаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.7-д заасан үүргийг хэрэгжүүлэн ажиллах талаар АТГ-аас Дархан-Уул аймгийн Засаг дарга С.Насанбатад албан бичгийг хүргүүлсэн байж. Өөрөөр хэлбэл, “Нийтийн албанд томилогдохоор нэр дэвшсэн этгээд тухайн албан үүргийг гүйцэтгэхэд илт ашиг сонирхлын зөрчил үүсч болох нь тогтоогдсон бол түүнийг тухайн албанд томилох эрх бүхий байгууллага, албан тушаалтан томилохоос татгалзах үүрэгтэй” гэснийг Дархан-Уул аймгийн Засаг дарга зөрчиж,  Д.Элдэвсайханыг уг албан тушаалд томилсон нь хяналт шалгалтаар тогтоогдсон байна.
Энэ үйлдэл нь хууль зөрчиж байгаа тул түүнд хариуцлага тооцох, илтэд ашиг сонирхлын зөрчилтэй этгээдийг нийтийн албанд томилсон зөрчлийг арилгуулах шаардлагатай гэдгийг АТГ-аас Дархан-Уул аймгийн ИТХ-ын дарга Г.Эрдэнэбат болон Засгийн газрын Хэрэг эрхлэх газрын дарга Ж.Мөнхбат нарт албан бичгээр мэдэгдлээ.