Венецийн дүрслэх урлагийн 57 дахь Олон улсын Биеннальд Монгол Улсыг төлөөлөн оролцох уран бүтээлчийг сонгон шалгаруулахаар болжээ. Учир нь, саяхан манай улс албан ёсоор оролцох эрхээ хүлээж авсан байна.

Тус наадам нь 1895 оноос хойш хоёр жил тутамд зохион байгуулагдаж ирсэн бөгөөд дэлхийд хамгийн нэр хүндтэй, олон улсын чанартай дүрслэх урлагийн уралдаан юм. Монгол Улс тус наадамд 2015 онд анх удаа оролцож байсан түүхтэй. 57 дахь удаагийн наадам нь 2017 оны тавдугаар сарын 13-ны өдрөөс арваннэгдүгээр сарын 26-ныг дуустал Италийн Венец хотноо долоон сарын туршид зохион байгуулагдах аж. Энэхүү Биеннальд оролцсоноор Монголын дүрслэх урлагийг дэлхийд таниулах, үнэ цэнийг нь өсгөх, хөгжүүлэх, цаашилбал хотын соёлын нэг хэсэг болгон төлөвшүүлэх, нийгэм эдийн засагт үзүүлэх нөлөөллийг нь нэмэгдүүлэх чухал ач холбогдолтой юм. Монголоос оролцох уран бүтээлчдийг сонгон шалгаруулах комисст дотоод, гадаадын нийт таван хүний нэр дэвшжээ.

Тэдний нэрийг удахгүй зарлах аж. Харин уран бүтээлчдийг сонгох шалгуур нь контемпорари урлагийн бүтээлүүдийг мэргэжлийн өндөр түвшинд туурвиж, дотоод, гадаадын нэр хүндтэй үзэсгэлэнд оролцож ирсэн туршлага, санал болгож буй бүтээл нь бэлэн эсхүл гүйцэтгэл нь дор хаяж 70 хувьтай байх, утга агуулга, зохиомж, ашигласан материал, гүйцэтгэлийн хувьд өөрийн гэсэн хэллэг, онцлох төрхтэй, давтагдашгүй шинэлэг байхаас гадна монгол орон, дэлхий нийтэд тулгарч буй чухал асуудлуудыг хөндсөн байх аж.

Шалгарсан баг Венецийн Биеннальд оролцох уран бүтээлчдийг ирэх сарын 15-ны дотор олон нийтэд зарлах юм байна.