Ж.ЖАМУХА
Монголын рок поп хөгжмийн ертөнцийн өндөр босгонд бүдрэлгүй өдий хүртэл уран бүтээлээ туурвисаар ирсэн “Гайс”-ын залуус их урлагийн тайзнаа хөл тавиад 19 жилийг ардаа үджээ. “Хайрын бүжиг”, “Эмзэгхэн хайр”, “Бороо”, “Цас”, “Зүрх уучил” тэргүүтэй сэтгэлд хоногшсон олон арван уран бүтээлээрээ залуусыг байлдан дагуулсаар ирсэн дөрвөн залуу 19 насны төрсөн өдрөө үзэгч, сонсогчидтойгоо хамт үүр цайтал тэмдэглэхээр зэхээд байгаа аж. Тодруулбал, энэ сарын 26-ны бямба гарагт “Studio entertainment” клубт ганцхан удаа тохиох тоглолт үдэш 21:00 цагт эхэлж үүрийн 04:00 цаг хүртэл үргэлжлэх юм байна. Энэ үдэш “Гайс”-ын залуусын 19 жилийн хүч хөдөлмөр шингэсэн бүх л уран бүтээлийг нэгтгэсэн цор ганц цомгийн багцийг дуудлагаар худалдахаас гадна төрсөн өдрийн бэлгүүд болоод ивээн тэтгэгч байгууллагуудаас барих гэнэтийн бэлгүүдээ шүтэн бишрэгчидтэйгээ хамт задлах юм байна.
Мөн энэ үдэш 19 жилийн хугацаанд гаргасан уран бүтээлүүдээ дээжлэн дуулахаас гадна 2016 оны шинэ дуунуудаа ч дуулах аж. Тоглолтод DJ Анна, Чин, Агваан, Нэкс, Боонз нар оролцож уран бүтээлээ толилуулах юм байна. Дашрамд сонирхуулахад, Монголд анх удаа долоон цаг үргэлжлэх тоглолт хийх болсны хувьд “Гайс”-ийнхан анхдагч болж байгаа юм. Тоглолтын талаар дэлгэрэнгүй мэдээллийг 99155555, 99197777 утсаар авах боломжтой аж.
