Оросын Бүгд Найрамдах Башкортостан улсын нийслэл Уфа хотод гурав дахь удаагаа Мөнгөн Акбузат буюу Далавчтай шидэт үлгэрийн морь кино урлагийн наадам болж байна. Энэ жилийн наадмыг “Ээж” Монголын уран сайхны киногоор нээсэн байгаа. “Родина” кино театрт нээлтээ хийсэн тус наадамд бүрэн хэмжээний, уран сайхны богино хэмжээний, баримтат, анимэйшн төрлийн киногоороо уран бүтээлчид оролцож буй. Цөөнх үндэстний орнуудыг хамардаг эл наадмын хүрээнд энэ жил 42 кино бүтээл дэлгэцэнд толилуулсан байна. Өнөөдөр шагнал гардуулах үйл ажиллагаа нь болох аж. Есөн номинацаар шилдгүүдээ шалгаруулах наадамд оролцсон “Ээж” кино эхийн сэтгэл, монголын ахуй амьдрал, өвөрмөц сэтгэлгээг харуулж чадсанаараа онцлогтой шагналын босгыг давах нь гарцаагүй хэмээн уран бүтээлчид нь догдолж буй.

Энэхүү кино маань мөн АНУ-ын Лос Анжелос хотод болж буй “Азийн дэлхийн шилдэг кино наадам”-д өрсөлдөж байгаа.  “Азийн дэлхийн шилдэг кино наадам” нь Азийн улс орнуудын ахуй соёл, ёс заншил, өвөрмөц онцлогийг кино урлагаар дамжуулан дэлхий дахинаа таниулан сурталчлах зорилготой байдаг. Тус наадамд Ази тивийн 50 гаруй орны кино уран бүтээлчид оролцож долоон номинацад өрсөлддөг бөгөөд тухайн бүтээлүүд дунд Оскар болон Алтан бөмбөрцөг кино наадамд өрсөлдөх кинонууд оролцдогоороо онцлогтой. Тус кино наадам ирэх сарын 1-нд дүнгээ гаргана.