Олон улсын ес дэх удаагийн циркчдийн тэмцээн Испани улсад өчигдөр эхэллээ. Энэ сарын 29-нийг хүртэл үргэлжлэх тэмцээнд Монгол Улсаа төлөөлж Монголын үндэсний циркийн Н.Энхболд багштай Т.Номуунбаатар ахлагчтай шидэх банз, дудартай акробатын жүжигчид оролцож буй юм. Түүнчлэн тэмцээний ерөнхий шүүгчдийн бүрэлдэхүүнд Монголын цирк хөгжлийн төвийн тэргүүн Н.Эрдэнэ ажиллаж байгаа билээ. Түүний хувьд энэ удаагийн тэмцээн он гарснаас хойш шүүгчээр ажиллаж буй хоёр дахь олон улсын тэмцээн нь юм. Манай циркчдийн хувьд цагийн зөрүү гарахгүй, бэлтгэл хийх цагаа хүлээх гээд багагүй бэрхшээлтэй тулгарч байсан ч амжилтаа ахиулахаар дор бүрнээ хичээцгээж байгаа гэнэ. Оролцсон тэмцээн бүрээсээ шагнал хүртдэг тэдний дээлний захыг энд үлдсэн хамт олон нь мушгиж, чих тавин хүлээж сууна.