АНУ-ын Сан Диего хотод ирэх зургадугаар сард дэлхийн шилдэг 24 тамирчны хооронд явагдах 75.000 долларын шагналын сантай “Extreme Memory Tournament-2016” ой тогтоолтын тэмцээн болно.
Тус тэмцээний урьдчилсан шалгаруулалт сарын турш онлайнаар явагдаж дүнгээ гаргажээ. Урьдчилсан шатанд манай улсаас зургаан тамирчин оролцохоор шалгарчээ. Мөн Олон улсын их мастер Э.Пүрэвжав "Numbers" төрөлд шинэ дээд амжилт тогтоосон байна. Тэрээр 80 цифрийг 18.06 секундэд тогтоон алдаагүй санажээ.
Тэмцээний финальд өрсөлдөх шилдэг 24 тамирчинд багтаж эх орноо төлөөлөн Олон улсын их мастер Ө.Сэнгэсамдан, 2015 оны өсвөрийн дэлхийн аварга, Олон улсын их мастер Э.Пүрэвжав, их мастер Б.Шижир-Эрдэнэ, олон улсын мастер Т.Энхжин, З.Цэцэгзул, А.Анударь нар өрсөлдөх юм.
Дашрамд дурдахад, өнгөрсөн жил тус тэмцээнд манай улсын таван тамирчин өрсөлдөж Т.Энхжин "Images" төрөлд 30 дүрсийг 14 секундэд тогтоон алдаагүй санаснаар дэлхийн дээд амжилт тогтоосноос гадна манайхан авсан мөнгөн шагналаараа Германы тамирчдын дараа хоёрт орж байв.
