Азийн топ модель, “Монголын мисс-2010” тэмцээний “Авьяаслаг мисс” өргөмжлөлт, загвар өмсөгч Т.Туяамаа өдгөө Австрали улсад суралцаж буй. Тэрээр суралцахын хажуугаар тус улсын “Platform and wink model” загварын агентлагт гэрээгээр ажиллаж, олон улсын загварын зах зээлд Монгол загвар өмсөгчдийн нэрийг гаргаж яваа. 
Тэгвэл энэ удаад тэрээр Америкийн гоо сайхны алдартай брэндүүдийн нэг “Covergirl”-ын нүүр царай болжээ. 
Тэрээр “Covergirl”-ын гурав хоногийн дараа нээлтээ хийх “Оддын дайн” киноны долоо дахь цувралд зориулан, цөөн тоогоор хийгдсэн “Star wars” limited edition цувралын нүүр царайгаар сонгогдон, “Covergirl” сэтгүүлийг ч чимээд амжжээ.
“Covergirl-Star wars” цувралд алдартай загвар өмсөгчид моделиор ажилласан төдийгүй дуучин Janelle Monae ч нэг дүр төрхийг амьдруулжээ. Дэлхийн алдартай бүсгүйчүүдээр нүүр хуудсаа чимж, дүр төрхөөрөө сонгодог “Covergirl” брэнд Монгол моделиор шинэ цувралынхаа өнгийг ийнхүү тодорхойллоо.
