А.АКЭРКЭ

Нэгэн үе уран бүтээлээрээ залуусыг байлдан дагуулж байсан “Сүнс”, “Камертон”, “Номин талст”, “Салхи”, “Гайс” хамтлагийнхан өнгөрсөн аравдугаар сард “Мартагдашгүй” нэртэй тоглолт хийж фэнүүдийнхээ цөсийг хөөргөж чадсан. Тухайн үед ганцхан өдөр тоглогдсон болохоор дахин тоглооч гэдэг хүсэлтдээ дарагдаад байсан билээ. Хэдийгээр дахин тоглохгүй гэдэг тайлбарыг удаа дараа өгөөд байсан ч энэ сарын 18-нд нэгдэхээр болсон сайхан мэдээг дуулгасан. Харамсалтай нь, энэ удаагийн тоглолтод “Камертон”-ыхон оролцохгүй юм байна. Учрыг нь тус хамтлагийн ахлагч дуучин Д.Болдоос тодруулахад “Манайх анхнаасаа оролцоно гэж яриагүй. Манай хамтлагийн нэрийг ашиглаж рекламаа явуулсан байна билээ. Ямар ч гэсэн рекламнаас нь нэрээ авахуулсан” гэв. Харин өөр нэг эх сурвалжийн хэлж буйгаар бол “Камертон” хамтлагийнхан бизнесийн хатуу гэрээтэй учраас энэ удаагийн тоглолтод оролцох боломжгүй болсон гэнэ.

Ийн дахин нэгдэх болсон шалтгаан нь дэлхийн дээд зэрэглэлийн клубуудын стандартаар Монголд анх удаа байгуулагдаж буй “CASTLE” клубийн нээлтэд зориулагдсан аж. Харин нэгэн баярт мэдээ дуулгахад, энэ удаагийн “Мартагдашгүй” тоглолтод “Freezone”, “Хар сарнай”, “Нисванис” хамтлагийнхан нэгдэж улам олуулаа тоглохоор болжээ. Тоглолтын тасалбарын үнэ эцсийн байдлаар гараагүй байгаа аж. Ямартай ч, энэ сарын 12 гэхэд тоглолтын талаарх дэлгэрэнгүй мэдээллийг болон тасалбар нь хэдэн төгрөг болохоо дуулгана гэдгээ зохион байгуулагчид нь мэдэгдэж байна.