Туркийн Истанбул хотноо өнгөрсөн амралтын өдрүүдэд зохиогдсон Гиннессийн дэлхийн дээд амжилтыг шинэчлэн бүртгэх шалгаруулалтад Монголын оюун ухааны академийн тамирчин Т.Мягмарсүрэн оролцсон ч харамсалтай нь дэлхийн дээд амжилтыг шинэчилж чадсангүй.

Түүний оролцсон “Хүн хуанли” төрөл 1600-2099 оны хооронд өгөгдсөн он, сар, өдөр ямар гараг болохыг алдаагүй тооцоолох дүрэмтэй. Оролцогч эл даалгаварыг 60 секундэд гүйцэтгэх ёстой бөгөөд одоогоор дэлхийн дээд амжилтыг Куба гаралтай АНУ-ын тамирчин Yusnier Viera эзэмшдэг аж. Энэ төрөлд оролцох тамирчидын оноог дүгнэхдээ нэг алдах эрх олгодог бөгөөд хэрэв хоёр ба түүнээс дээш алдвал зөв хариу гаргасан ч оноо тооцдоггүй хатуу дүрэмтэй юм. Манай тамирчин Т.Мягмарсүрэн эхний 118 өдрийг 60 секундэд бодож дэлхийн дээд амжилтаас илүү тооцоолсон ч 85 дахь бодлого дээр хоёр дахь алдаа гаргаж Геннисийн амжилтад бүртгэгдэж чадаагүй байна. Гэхдээ Ази тивийн дээд амжилтыг шинэчлэн тогтоосон юм.