“Инээмсэглэх Монгол-Найрсаг Улаанбаатар” аяны хүрээнд “Та өөрөө гэрэл” богино хэмжээний кино наадмыг Нийслэлийн аялал жуулчлалын газар, JCI монгол болон “Bright Mongolia” төрийн бус байгууллагаас хамтран зохион байгуулж байна. Уг кино наадамд хүндлэх, уучлах, талархах гэсэн гурван сэдвийн хүрээнд гар утас, мэргэжлийн камер ашиглан хийсэн бүтээл хүлээн авсан бөгөөд хувь хүн, уран бүтээлийн нэгдлүүдээс нийт 25 бүтээл ирүүлээд байгаа аж. Шилдэг бүтээлийн эздийг онлайн санал хураалт буюу фэйсбүүк лайк, шэйрээр дүгнэн шалгаруулахаас гадна мэргэжлийн хүмүүс ч шүүх гэнэ. Тэмцээний нэгдүгээр байрыг хоёр сая төгрөг, хоёр нөүтбүүкээр урамшуулах бол хоёрдугаар байрт нэг сая төгрөг, гуравдугаар байрт 500 мянган төгрөгийн шагнал олгох юм байна. Мөн байр тус бүрт Улаанбаатар хотын захирагчийн нэрэмжит, “Canon”брэндийн нэрэмжит шагналуудыг тус тус гардуулна. Тэмцээний дүн эцсийн байдлаар энэ сарын 13-нд гарах ажээ.
