Сайншандаас Таван толгой хүртэлх Хөгжлийн төмөр замыг концессын гэрээгээр тавихаар хувийн хэвшлийнхэн Засгийн газартай гэрээ хийж, их бүтээн байгуулалтын ажилдаа ханцуй шамлан орлоо. Хэдийгээр төр өөрийн хөрөнгөөр энэхүү төмөр замыг барихаар төлөвлөж байсан ч үндэсний аж ахуйн нэгжүүддээ итгэл хүлээлгэн концессын гэрээ байгууллаа. 225 км урт төмөр замыг тавихад нэг км нь л 2.5 тэрбум төгрөгөөр баригдах эхний тооцоо бий.
1520 мм өргөн царигтай шинэ төмөр зам нь 14 өртөө зөрлөгтэй, жилд 48 сая тонн ачаа тээвэрлэх хүчин чадалтай, компьютерийн удирдлагын системтэй байх аж. Төмөр замын барилгын ажлыг өмнө нь Сэлэнгийн Ерөөгийн 98 км төмөр замын ажлыг гүйцэтгэж байсан “Дорнын төмөр зам” компани болон “Монголиантранс Лайн” компаниуд гүйцэтгэнэ. 2.5 жилийн хугацаанд ашиглалтад өгөх гэрээтэй учраас төмөр бетон дэр үйлдвэрлэх үйлдвэр эхлээд барьж байгуулах аж.
Гүйцэтгэгч компаниуд өнгөрсөн мягмар гаригт “Хөгжлийн төмөр зам”-ынхаа нээлтийг хийж, 600 гаруй ажлын байр шинээр бий болохоос гадна 1900 орчим ажиллах боловсон хүчин хэрэгтэй байгааг ч илэрхийлж байсан юм.
“Шинэ зууны их бүтээн байгуулалт-Хөгжлийн төмөр зам” уриатай Сайншандаас Таван толгой хүртэлх төмөр замын нээлтэд Зам тээвэр, барилга, хот байгуулалтын яамны Төрийн нарийн бичгийн дарга Ж.Бат-Эрдэнэ, зам, тээврийн бодлогын хэлтсийн дарга Д.Наранпүрэв, мэргэжилтэн Б.Зоригтбаатар болон “Дорнын төмөр зам” компанийн захирал Б.Дэлгэрсайхан, “Монголиантранс Лайн” компанийн захирал М.Сүхбаатар нар оролцсон юм.
Нээлтийн үеэр “Монголиантранс Лайн” компанийн гүйцэтгэх захирал М.Сүхбаатар ярихдаа “Төмөр зам барих концессын гэрээг амжилттай хийлээ. Энэхүү гэрээ маань өөрөө хөрөнгө санхүү босгох том баталгаа. Засгийн газрын төлөвлөгөөний дагуу Сайншандын аж үйлдвэрийн паркаас гарсан бүтээгдэхүүнийг дэлхийн зах зээлд хүргэх төмөр зам ийнхүү эхний шангаа татлаа. Олон улсын санхүүгийн байгууллагад төсөл, гэрээ хэлцлээ танилцуулаад мөнгө босгоно. Бид концессын гэрээний дагуу тодорхой хугацааны дараа төр засагт энэхүү төмөр замаа хүлээлгэн өгөх юм. Төмөр зам барихад шаардлага хангасан хайрга гурван газар олдоод байна. Манай компани бол зөвхөн төмөр зам тавих үүрэг хүлээнэ. Харин ачаа тээврийн асуудлыг төр засаг шийднэ. Бидний хийсэн Техник эдийн засгийн үндэслэлээр төмөр замд ашиглалтад орсны дараах 23 жилийн дотор гаргасан зардлаа нөхнө гэсэн тооцоо хийсэн. 3уун жил ашиглагдах нэгдүгээр зэргийн төмөр зам тавина. Хямд өртөгтэй, тээврийн иж бүрэн дэд бүтэц байх болно” гэв.
Гэвч энэ төмөр замтай зэрэгцээд Ухаа худагаас Гашуунсухайтын чиглэлийн төмөр замыг “Энержи Ресурс” компани барихаар болжээ. “Энержи Ресурс” компани нүүрс баяжуулах үйлдвэртээ түшиглэн энэхүү замаа ашиглах нь тодорхой. Мэдээж зөвхөн өөрийнхөө олборлож, боловсруулсан ч гэлтгүй магадгүй Оюу толгойгоос олборлосон баялаг нь энэ төмөр замаар урд хилээр гарах биз.
Концессын гэрээ дуустал шинээр баригдаж байгаа төмөр зам хувийн мэдэлд ашиглагдах бөгөөд дараа нь төр засаг 51 хүртэлх хувийг эзэмшинэ. Монгол Улсын түүхэнд анх удаа ийнхүү хувийн хэвшлийнхэн өөрийнхөө хөрөнгөөр, өөрөө хөрөнгө босгон төмөр зам тавих нь. Гэвч… Хэрхэн ашиглаж, хувийн хэвшилд ямар түрээс төлөх вэ, хаанаас санхүүжилт авах бол…, үнэхээр 2.5 жилийн дараа ашиглалтад орж чадах уу гээд асуултын тэмдэг үргэлжирсээр. Хамгийн бахархууштай нь хувийн хэвшлийнхэн өөрийнхөө хөрөнгөөр асар их өндөр өртөгтэй төмөр зам тавих чадамжтай болжээ.
