Соёлын гавьяат зүтгэлтэн Гүн овогт Г.Аюурзаны удаах ном мэндлэх тун дөхжээ. Тэрээр “Бичиж байгаа романд минь хасбуу тамганы ул мөр хайж яваа нэг фанат нөхөр гардаг юм. Та бүхний хуучин танил Мэндээ л дээ. Тэгээд би өөрөө бас иймэрхүү зүйлтэй хөөцөлдөөд ядарч унах гэж байна. Энэ ганган найман метр урт хадган дээр 198 удаа дарсан дардсыг ч хасбуу гээд, Мүгдэнээс олдсон өөр нэг дардсыг ч хасбуу гээд, толгой эргэж гүйцлээ... Энэ сэдвийг хаях нь дээр бололтой. Бас баахан засвар хийхээс... Засвараа хийж гүйцээд л номоо хэвлүүлнэ дээ. Сарын дараа л болов уу гэж залбирч байна” гэж бичжээ. Түүний хамгийн сүүлд гаргасан “Цагаан, хар, улаан” номын нэг дүр бол Мэндээ. Тэрээр эртний олдвор хайж, дамлан ашиг ологч нэгэн. Тиймээс шинэхэн төрөх гэж буй романыг “Цагаан, хар, улаан” романы үргэлжлэл хэмээн таамаглаж байгаа юм.
Зохиолч Г.Аюурзана хэвлэлд нэгэнтээ “Номоороо амь зууж байгаа зохиолч Монголд зөвхөн би л юм биш үү” гэж хэлж байсан удаатай. Түүний бичсэн “Гурамсан цадиг”, “Бөөгийн домог”, “Цагаан, хар, улаан”, “Цасны роман” нь Монголд гүйлгээтэйгээс гадна зарим нь гадаад хэлнээ орчуулагдаж, худалдаанд гарсан билээ.
