Төсвийн хөрөнгө завшигчдад удаан хугацаагаар, бүр бүх насаар нь хорих ял оногдуулж байх тухай хуулийн төслийг ОХУ-ын Төрийн думд оруулан хэлэлцүүлэх гэж байна хэмээн “Известия” мэдээллээ.

Төрийн думын депутат Антон Ищенко, Иван Сухарев нарын өргөн барьсан төслөөр бол Эрүүгийн хуулийн “Төсвийн хөрөнгө завшсан” гэсэн  зүйл ангид 10 сая хүртэл рубль хулгайлсан бол 5-10 жил, 10-50 саяыг завшвал 7-12 жил, 50 саяас дээш рублийн хөрөнгө зувчуулсан бол 10 жилээс бүх насаар нь шоронд хорих ял оноохоор тусгажээ.

Эрүүгийн хуулийн энэ зүйл ангийн “Төсвийн бус сангийн хөрөнгөнөөс завшвал” гэсэн хэсэгт 5-10 жил хүртэлх хугацаагаар хорьж тодорхой албан тушаал хашихыг нь 10 жилээр хориглох заалт оруулсан байна. Хэрэв энэ хэргийг бүлэг хүмүүс хэлцэн тохирч үйлдсэн бол 7-12 жил хорьж, тодорхой албан тушаал эрхлэхийг нь 12 жилээр хориглох, гэмт хэргийн бүлэглэл их хэмжээний хөрөнгө завшсан бол 10-20 жилээр юм уу, бүх насаар нь хорих ялаар шийтгэхээр заажээ.

Хуулийн төсөл боловсруулагчдын үзэж байгаагаар бол ингэснээр авлига цэцэглэх үүдийг хаах юм байна.