Хятадад өчигдөр тэмдэглэсэн ганц бие хүмүүсийн өдрөөр Alibaba онлайн худалдааны сайт ганцхан цагийн дотор хоёр тэрбум ам.долларын худалдаа хийжээ. Анх 1993 оноос Нанжины их сургуулийн оюутнууд Валентиний баярын эсрэг ганц бие хүмүүсийн өдрийг тэмдэглэж эхэлснийг сүүлийн жилүүдэд Хятадад онлайн худалдааны сайтууд өргөнөөр ашиглаж, синглүүдийг ганц өдөр ч гэсэн өөрсдийгөө эрхлүүл хэмээн уриалан дуудах болсон юм. Тэдний энэ уриалга ч синглүүдэд таалагддаг бололтой түрийвчээ гайгүй сайн нимгэлж авдаг болжээ. Өнгөрсөн жил гэхэд энэ өдөр Хятадын ганц биетнүүд 3,1 тэрбум ам.долларын худалдаа хийсэн бөгөөд энэ удаад рекордыг эвдэнэ гэж Алибабагийн захирал Жак Ма итгэж байна. Өчигдрийн тухайд нэг цагийн дотор хоёр тэрбумын гүйлгээ хийсэн учраас өнгөрсөн оны амжилтаа давуулах нь тодорхой байгаа юм. Түүний тооцоолж буйгаар энэ өдөр 200 сая багц бараа ачуулахаар байгаа аж.
Хятадын төдийгүй дэлхийн хамгийн том интернэт худалдааны сайт “Alibaba” 2009 оноос хойш синглүүдийн өдрийг тэмдэглэж буй бөгөөд өчигдөр борлуулалтаа нэмэгдүүлэхээр томоохон хямдрал зарласан юм.
Хятадын онлайн худалдааны зах зээл сүүлийн хэдэн жилийн дотор 25 хувиар өргөжиж, энэ онд нийт худалдаа эргэлт нь 390 тэрбум ам.долларт хүрчээ. Гурван жилийн дараа гэхэд энэ тоо 718 тэрбумд хүрнэ гэсэн төсөөлөл бий.
