ОХУ-ын ерөнхийлөгч Владимир Путины илгээсэн Оросын зэвсэгт хүчний цэргүүд Украинд болж байгаа үйл явдал, цуст дайны талаар үнэнийг ярьж байна гэсэн материалыг Newsweek сэтгүүл гадар нүүрэндээ толгой  гарчигтайгаар нийтэлжээ.
        
Хэвлэлд бичсэнээр бол Костром мужийн Садиславск хотхоны иргэн орос эмэгтэй Людмила Малинина орос цэргүүд нутгийн оршуулгын газарт нэгнийгээ харанхуй шөнөөр нууцхан оршуулж байгааг харснаа сэтгүүлчдэд нулимс дуслуулан ярьжээ. Түүний ярьснаар бол оройн 20,00 цагийн үед оршуулгын газарт ачааны машин ирээд хэд хэдэн биерхүү залуу гарч ирснээ булшны нүх ухаж яг л ямар нэгэн юм хулгайлж байгаа юм шиг нууцаар ажилласан гэнэ.
Хөрш эмэгтэйчүүд нь ч ийм нууцлаг оршуулгыг харснаа бас ярьжээ. Тэдний хэлснээр бол оршуулгын газрын ихэнх хэсэг нь ийм нэр нь үл мэдэгдэх цэргүүдийн оршуулга болсон гэснийг энэ өгүүлэлд дурджээ.
Оросын зэвсэгт хүчний нэг цэргийн ярьснаар бол түүний алба хаадаг 98 дугаар бригадыг ёстой л Украины зүүн бүсэд үхэл рүү нь илгээсэн гэнэ. Түүний зэвсэг нэгт хэдэн арван нөхөд нь украинд нас барсан бол нэг хэсэг нь Ростовын эмнэлэгт хүнд шархнаасаа болж нас баржээ. Бас нэг хэсэг нь Орос руу австай буцсан гэнэ. Түүний ярьснаар бол Украин руу очсон хэн ч гэсэн ингэж “ачаа 200” болох байх гэсэн айдастай явж байгаа гэнэ.
“Биднийг Украин руу байлдуулахаар явуулж байгаа гэж хэн ч мэдээгүй, зүгээр л хээрийн сургуульд гарч  байгаа юм байх гэж бодсон. Украин руу явуулж байгааг мэдсэн бол бүр Костромд байхдаа л халагдах байсан. Би чинь хоёр жаахан хүүхэдтэй хүн шүү дээ” гэж оросын тэр цэрэг ярьжээ.
Донбасс руу илгээсэн орос цэргүүдийн ихэнх нь ерөнхийлөгч Владимир Путиныг, Новороссия гэж улс байгуулах гэсэн түүний эрмэлзлийг дэмжихгүй байгаа гэнэ. Орос цэргүүдийг украинд оруулахдаа орос гэдгийг нь таниулахгүйн тулд барууны орнуудын дүрэмт хувцас өмсүүлдэг гэнэ.
“Хэн ч цэргийн албан хаагчидтай гадаад оронд байлдахаар явж байгаа шүү гэсэн нэмэлт гэрээ контракт байгуулаагүй” гэж тэр цэргийн албан хаагчийн ярьсныг хэвлэлд онцолжээ. “Би хэзээ ч ийм зүйлд сайн дураараа  оролцохгүй, маргааш гэхэд л биднийг махан таташ болгохоор өөр нэг тийшээ илгээх нь байна шүү дээ. Хэн нэгэн нь үнэнийг бидэнд хэлсэн бол бидний хэн нь ч сарын мянган долларын төлөө тэгэж явахгүй байсан” гэж нэрээ хэлэхийг хүсээгүй, 30 настай офицер ярьжээ.
“Украинд болж байгаа мөргөлдөөн бүр өнгөрсөн хавраас л сунжирч эхэлсэн” хэмээн хэвлэл тэмдэглэсэн байна. Дөрөвдүгээр сарын 16-нд цэргийн хээрийн дүрэмт хувцастай босогчид зүүн Украины Славянск хотын захиргааны байрыг бүсэлж эхэлсэн. “Бид ЗХУ-д төрсөн, үнэнч Орост хүмүүс. Яг л Крым шиг” гэж босогчдын нэг ярьсныг хэвлэл иш татжээ.
Зургадугаар сарын 2 гэхэд “ачаа 200” тээсэн анхны машинууд Орост ирсэн. Тэр машинаар оросын цэргийн “сайн дурын” албан хаагчдын 31 шарил ирсэн юм. Тэдний ихэнх нь сайндаа л 30, цөөн хэд нь 40 орчим настай байсан” гэж Newsweek сэтгүүл өгүүллээ төгсгөжээ.