Кобани хотыг хамгаалж байгаа курдуудэд зориулан онгоцноос хаясан зэвсгийн зарим хэсэг нь “Лалын улс” бүлэглэлийн алан хядагчдын гарт орсон байж болзошгүй тухай АНУ-ын Батлан хамгаалах яамнаас мэдээлж байна. Өнгөрсөн даваа гарагт Америкийн цэргийн нисэх хүчний онгоц Кобани хотын курдуудэд буу, сум болон бусад төрлийн байлдааны тоног хэрэгсэл бүхий контейнерүүдийг шүхрээр хаяж өгсөн. Нийт 27 ширхэг контейнер агаараас буулгасан, тэдний дийлэнх олонх нь курдын өөрийгөө хамгаалах хүчний гарт хүрсэн гэж Пентагоны төлөөлөгч контр адмирал Жон Кирби мэдэгдэж байсан. Гэхдээ дараа нь ямар ч байсан нэг контейнер алан хядагчдын хянаж байгаа газар буусан тул дараа нь дэлбэлсэн гэж нэмж мэдэгдсэн юм.
Гэтэл өчигдөр “Лалын улс” бүлэглэлийнхэн курдуудэд зориулан америкчуудын хаясан буу, сум, тоног хэрэгслийг харуулж байгаа бичлэг интернэтээр тархсан.
Үүний дараа АНУ-ын Батлан хамгаалах яам тус бичлэгийн нарийвчлэн судалж байгаа ч хараахан бичлэг хуурамч эсэх талаар тодорхой хариу өгөх боломжгүй байна гэв.
Пентагоны төлөөлөгч “Шүхрээр хаясан ачаатай тун төстэй болохоор ямар ч байсан ийм боломжийг бүрэн үгүйсгэхгүй” гэлээ.
