Нүүдэлчин ард түмэн бидний дунд ч өдөр тутмын хэрэглээ болоод байгаа кофе гэдэг ундааны нэр хаанаас үүсэлтэй болохыг мэдэх үү. Тэгвэл кофе /coffee/ гэдэг үг тэртээ 1582 онд англи хэлний үгсийн санд орж иржээ. Англичууд энэ үгийг Голландын коффие /koffie/ гэдэг үгнээс авсан бол голландчууд энэ үгээ турк хэлний кахве /kahve/ гэсэн үгнээс авсан юм байна. Гэтэл кахве нь ч Турк хэлний уугуул үг биш бөгөөд тэд араб хэлний кахва /qahwa/ буюу qahhwat al-bun гэсэн үгнээс зээлдсэн байжээ. Тэгэхээр кофе гэдэг нь явж явж араб хэлний “qahhwat al-bun” буюу “борголын дарс” гэсэн үгнээс гаралтай ажээ. Боргол гэдэг нь кофены үрийг хэлдэг монгол үг билээ. Дашрамд сонирхуулахад кофег бүр XIII зууны үед Африк, тэр дундаа Этиопт анх хэрэглэж эхэлсэн бөгөөд түүний дараах зуунаас Арабын орнуудад нэвтэрсэн гэдэг.
