NFL-д тоглодог, Америк хөлбөмбөгийн од Рэй Райс эхнэрээ зодсон бичлэг интернэтээр тарсны дараа америкчууд Ерөнхийлөгчөөсөө эхлээд гэр бүлийн хүчирхийллийн эсрэг дуу хоолойгоо нэгтгэж эхэллээ. Тэд эхнэрээ зэрлэгээр зодож буй Рэй Райсыг нүүрээ хийх газаргүй болтол шүүмжлэн буруушааж, баг нь хүртэл гэрээгээ цуцалжээ.
Уг нь, Рэй Райсын гэр бүлд тохиолдсон энэ явдал өнгөрсөн оны хоёрдугаар сард Атлантик ситигийн "Revel" зочид буудалд болжээ. Рэй Райс эхнэртэйгээ муудалцаж, цахилгаан шатанд ормогцоо түүнийг алгадаж, дараа нь ухаан алдтал нь цохиж унагасан нь лифтний камерт бичигдэж үлджээ. Түүний гэр бүлийн хүнээ зодож танхайрсан энэ балмад явдал хэвлэл мэдээллийн хэрэгслээр аль эрт гарсан боловч өдий хүртэл бодит баримт болох цахилгаан шатны бичлэг нийтэд цацагдаагүй байсан учраас NFL-ээс түүнийг шийтгэхээ азнаж байсан юм.
Аль өнгөрсөн хавар шуугиан дэгдээж байхад нь NFL тоглогчоо хамгаалан үлдэж, ердөө хоёр тоглолт өнжиж, 500 мянган ам.долларын торгууль ногдуулсан юм. Рэй Райсын эхнэр ч энэ явдлыг цаашид хэвлэлээр дэвэргэхийг хүсээгүй бололтой, нөхрийнхөө хамт олны өмнө мэдэгдэл хийхдээ тэр явдалд өөрийнх нь буруу ч бас байсан гээд уучлал гуйсан юм. Харин эхнэрээ зодсон Рэй Райс огтхон ч уучлал гуйгаагүйгээр барахгүй түүний тоглодог "Baltimore Ravens" баг эхнэрийнх нь уучлал гуйсныг Твиттерээр дамжуулж байв. 
Гэвч энэ бүх шударга бус байдал өчигдөр ТМZ цахим хуудсаар цахилгаан шатны бичлэг цацагдсанаар төгсгөл болов. Эхнэрээ ухаан алдтал нь цохиж буй Рэй Райсын балмад үйлдлийг америк даяар шүүн хэлэлцэж, Ерөнхийлөгч Б.Обама хүртэл мэдэгдэл гаргалаа. Тэрээр "Жинхэнэ эрчүүд эмэгтэй хүнийг зоддоггүй юм. Хоёр охинтой эцэг хүний хувиар ч, Америкийн жирийн нэг иргэний хувиар ч иргэншсэн нийгэмд гэр бүлийн хүчирхийлэл байж таарахгүй. Гэр бүлийн хүчирхийллийг зогсоох нь хөлбөмбөгөөс ч чухал асуудал юм. Үүнийг зогсооход хүн бүр оролцож хариуцлага хүлээх хэрэгтэй" хэмээн Ерөнхийлөгчийн мэдэгдэлд дурджээ. 
Энэ мэдэгдэлтэй зэрэгцэн "Baltimore Ravens" баг Рэй Райстай байгуулсан 40 сая ам.долларын гэрээгээ цуцалснаа зарласан бол NFL-ээс түүний тоглох эрхийг тодорхойгүй хугацаагаар хорьжээ. NFL-ийн бусад од тоглогч ч энэ бичлэгийг үзээд Рэй Райс шиг хүчирхийлэгч хөлбөмбөг тоглох эрхгүй, хууль ёсны шийтгэл хүлээх ёстой гэж тус тусын Твиттерээр үзэл бодлоо илэрхийлж байна. Мөн Рэй Райсын шүтэн бишрэгчид ч түүний нэртэй өмсгөлийг шатааж буй зургаа интернэтээр тараажээ. Ийнхүү Рэй Райсын нэр хүнд хэдхэн цагийн дотор дахин сэргэх аргагүйгээр унаж, америкчууд гэр бүлээ хүчирхийлэгч балмад эрсийг хүлээн зөвшөөрөхгүй гэдгээ харууллаа. 
