АНУ-ын Миннесота мужид Жеймс Вүүд гэгч эрийн гэрт хорвоогийн хамгийн тэнэг хулгайч оржээ. Түүнийг гэртээ ирэхэд хулгайч орсон нь илт хамаг мөнгө, карт, үнэтэй цаг зэргийг нь аваад явсан байж. Хулгайч тэгэхдээ хэдэн хуучин хувцсаа орхиод явж. Хамгийн сонирхолтой нь, хулгайчид хэрэгтэй юмаа аваад гарахад нь хангалттай цаг гарсан уу, яасан гэрийн эзний компьютерээс нь Facebook хуудсандаа холбогджээ. Харин явахдаа хуудаснаасаа гарахаа мартаад орхичихож.
Мэдээж гэрийн эзэн Жеймс Вүүд компьютерээ шалгаад хулгайчийг дор нь олоод авчээ. Ингээд тэрээр Facebook хуудсаар нь түүнийг хулгайч гэдгийг зарлаад, түүний тухай мэдээлэл өгөхийг найзуудаас нь хүсч. Гэтэл хулгайч түүн рүү өөрөө залгажээ. Тэгэхээр нь гэрийн эзэн түүнд гэрт нь хувцаснуудаа орхиод явсан байна, ирээд авахгүй юу гэхэд өө тэгье гээд л хүрээд ирсэн гэнэ. Мэдээж түүнийг ирэх үед цагдаагийнхан хүлээж байсан бөгөөд өмнө нь хэд хэдэн хулгайн хэрэг хийж байсан түүнийг барьж авчээ. 
