Дархан цаазат Богд хан уулыг унаган төрхөөр нь хадгалах үүднээс тэнд байсан гэр хорооллыг  1980-аад онд нүүлгэсэн. Харамсалтай нь 1990-ээд оноос хойш Богд хан уулын нутаг дэвсгэрт  аялал жуулчлал хөгжүүлэх зорилгоор  газар олгоно гэдэг малгай доор Байгаль орчны яам, Богд хан уулын тусгай хамгаалалттай газрын захиргаанаас газар олгож эхэлсэн нь дархан цаазат энэ уулыг орон сууцны хороолол болгох ажлын эхлэлийг тавьжээ.

Үүнээс үүдэн нийслэлийн мэргэжлийн хяналтын газар энэ аман дахь  32 аж ахуйн нэгжийн 256 барилгад шалгалт хийсэн байна. Аялал жуулчлалын зориулалтаар эзэмшинэ гэчихээд орон сууц барьдаг энэ аж ахуйн нэгжүүдийн ард өндөр албан тушаалын хүмүүс байдаг болохоор шалгалт хийхэд дээрээс дарамт шахалт үзүүлж байсан тухайгаа НМХГ-ын дэд дарга М.Баасандорж онцолсон.
Энд барилга байшин барьсан аж ахуйн нэгжүүдэд газраа зориулалтын дагуу ашиглаагүй, байгаль орчны нөлөөллийн үнэлгээ хийлгээгүй, тусгай хамгаалалттай газар нутгийн тухай хууль, усны тухай хууль зөрчсөн, барилга байгууламж барих зөвшөөрөл аваагүй гэсэн нийтлэг зөрчлүүд илэрсэн байна. Энд нийслэлийн төвлөрсөн усан хангамж, цэвэр бохирын систем очоогүй болохоор энэ аж ахуй нэгж, иргэд нийтдээ 280 гаруй гүний худаг гарган, ашиглаж байна. Ингэж олон худгаар усыг соруулах нь Богд хан уулын байгаль орчин, амьтан, ургамалд сөргөөр нөлөөлөхийг Мэргэжлийн хяналтын байгууллагын шалгалтаар тогтоожээ.
Тэр бүү хэл Туул голын эрэгт шахаад барьчихсан хороолол ч байна гэлээ.
Нөгөө талаар хотын хэтийн  төлөвлөгөө, зураг төсөлд  огт ороогүй болохоор өнөөдөр  Зайсанд баригдаж буй байшин барилга, орон сууцны хорооллууд өөр  хоорондоо харилцан уялдаагүй, барилга хоорондын зай зөрчигдсөнөөс орц, гарц хаагдах, гадна тохижилт, ногоон байгууламж, зам, зогсоол хийх боломжгүй болжээ. Авто маины зогсоол бүү хэл зарим барилга руу машин очих боломжгүй барьсан явдал ч байжээ.
Энэ бүхнээс мэргэжлийн байгууллага дүгнэлт хийж үзэхэд одоо “хотын ногооон байгууламжид, хотын төвд ойр” хэмээн зарлаж сурталчлаад байгаа эдгээр орон сууцанд байр авч байгаа  иргэд хоёр гурван жилийн дараа гэхэд цэвэр бохир усны асуудалд орж бохиртойгоо холилдон зутрах аюулд хүрч болзошгүй хэмээн анхааруулж байна.
Зарим зөрчил дутагдлыг арилгуулах үүднээс НМХГ зарим байгууллагын цахилгааныг түр тасалсан байна. Харин шалгуулахаас зайлсхийж холбогдох байгууллагад баримт бичиг, материалаа ирүүлэхээс татгалзсан 13 байгууллагыг албадан шалгах юм байна.