Ахан дүүсийн найрамдал, Монгол-Зөвлөлтийн найрамдал гэдэгсэн дээ. Бидний өмнөх үеийнхэн ингэж дуулж, баясч, бас жагсч, тангараг өргөж байсансан.  Нэгэн цагт үнэхээр ийм л байсан. “Москвад гэдэс эвгүйрэхэд Монголд унгадаг, Болгарт чяцга алддаг” гэсэн үг байдаг даа.

Зөвлөлтийнхөн, оросуудыг Хятадад, Испанид, Египетэд, Вьетнамд  зөвлөхүүдээ илгээн ард иргэдийнх нь эсрэг цус урсган тухайн үеийнхээ хамгийн орчин үеийн зэвсэг ашиглан байлдаж байхад бид дуугүй л аялдан дагалдаж “бүх дэлхийд коммунизм байгуулах гэж байгаа юм байна” гэж итгэж байсан. Ийм л цаг үеийг туулж ирсэн бид Зөвлөлтийг, Оросыг муу хэлэлгүй, ингэж хэлбэл амь амьдралаасаа сална гэсээр өнөө хүрч. Үнэхээр ч тийм л байсан.
Тэгээд өнөөдөр юунд хүрэв. Зөвлөлт ах нар шиг сайн хүн байхгүй, дэлхийд коммунизм байгуулах шиг гайхамшигтай зүйлгүй гэсээр өнөө хүрсэн атлаа өнөөдөр мөн чанарыг нь танив уу.
Гэтэл өнөөдөр Зөвлөлт нь тарсан ч гэсэн, Орос улс, өнөөгийн удирдагч В.В.Путин нь хэн болохыг одоо л ухаарч эхэлж байна. Бид ингэхэд ямар хөрштэй юм бэ.

Дарангуйлагчийг дэмжиж иргэдийн эсрэг

Сири улсад ерөнхийлөгч Башар Асадыг эсэргүүцсэн хөдөлгөөн өрнөж ард иргэд нь гудамжинд жагсан, Асадын дэглэм болохоор тэднийг дарангуйлан дарах гэж мөргөлдөөн үүсч иргэний дайн дэгдэж байхад ОХУ,  Башар Асадын дэглэмийг зэвсгээр хангаж байлаа. Үүнийгээ ОХУ-ын эрх баригчид “Бид өмнө нь байгуулсан гэрээнийхээ дагуу зэвсэг нийлүүлж байгаа юм” гэж тайлбарлаж байсан юм. Энд ердийн зэвсгээс гадна оросын дунд тусгалын СС пуужин хүртэл байлаа.
Чухамдаа ингэж ОХУ-ын өнөөгийн эрх баригчид Сирид олон жилийн турш эрх барьж, ард иргэдийнхээ эрх эрх чөлөөг хааж байсан дарангуйлагчдын талд орж,  дарангуйлагчдад зэвсэг нийлүүлэн, энгийн ард иргэдийг хядах ажилд нь тус дэмжлэг үзүүлж ирсэн юм.
Яахав олон улсын санал санаачилга зүтгэлээр Сирид химийн зэвсэг хэрэглэхийг хориглох гэж, химийн зэвсгийн нь нөөцийг устгах гэж гэрээ хэлэлцээр байгуулсан болохоор аргагүйн эрхэнд ОХУ нэгдэж байгаа ч ОХУ гэдэг энэ улс дарангуйлагчдын талд байгаа нь энэ үйл явдлаас нуух аргагүй харагдсан. Тэнд хөөрхий лалын шашинтай ард иргэд цусандаа хутгалдаж байхад Путин дарангуйлагчдыг зэвсгээр ханган далдуураа "Ард иргэдээ хядаад бай" гэж байлаа.

Иргэдийг хөөрөгдөж улсынх нь эсрэг

Украинд төр эргэв. Чухамдаа ерөнхийлөгч Виктор Янукович нь ОХУ-ын талыг дэмжсэнээр улс орон даяараа Европын холбоог дэмжье гэж хөдөлгөөн өрнөлөө. Ганцхан энд ОХУ өөрийнхөө байгалийн хий, бусад бүтээгдхүүний зах зээлийг хадгалах гэж орос гаралтай иргэдээ түшиглэн үймүүлснээр энэ улс бүрэн задрах дээрээ тулаад байна.
Хэн үүний ард байв. Чухамдаа ОХУ,  Ерөнхийлөгч В.В.Путин. Өнөөдөр Украины зүүн бүс нутагт хэн үймээн дэгдээж байна вэ. Оросын энгийн хувцас өмссөн тусгай тасгийнхан. Тэд ямар ч таних тэмдэггүй, дүрэмт хувцас өмсөөд, оросын хамгийн сүүлийн үеийн зэвсэг хэрэглэн  иргэдийн дунд орж үймээн дэгдээж байгаа.  
ОХУ өнөөдөр Сирид дарангуйлагч Башар Асадын талд орон энгийн ард иргэдийн эсрэг хүч хэрэглэж алан хядахыг  дэмжиж байгаа бол  Украины салан тусгаарлагч хүчний талд орж төрийнх нь эсрэг турхирч байна.
Үүнийгээ хэрхэн хэрэгжүүлж байна вэ. Улс орноо удирдаж бүрэн чадахаа байгаад эх орноосоо зугтаасан ерөнхийлөгч асан Виктор Януковичийг эх орондоо орогнуулан бүрэн дэмжиж, байн байн хэвлэлийн хурал хийлгэн өөгшүүлж байна.
Оросын телевизийн бүх сувгаар Украины өнөөгийн эрх баригчдыг бүх талаар муу хэлэн Орос орон төдийгүй, украины орос хэлтэй нийт иргэдэд Украин шиг муу улс байхгүй гэсэн ойлголт төрүүлэх гэж оролдож байна.  
Үүний зэрэгцээ Украины зүүн бүс нутагт оршин суудаг орос хэлтэй иргэдээ түшиглэн тэднийг салан тусгаарлах, улсынх нь эрх баригчдын нь эсрэг турхирах нь ямар вэ.

Том гүрний эрх ашиг

Энэ бүхний том гүрний эрх ашиг гэдгээр захын хүн тайлбарлаж байна. Мэдээж том гүрэн гэдэг АНУ ч, ОХУ ч мэдээж өөр өөрийн эрх ашигтай. Зөвлөлт засгийн үед ч хаант засгийн үед ч Орос өөрийн гэсэн эрх ашигтай байсан Иймдээ ч ЗХУ гитлерийн германтай нууцаар хэлэлцэн тохирч европыг хуваах гэрээ байгуулж байсан.   Өнөө ч гэсэн ийм л байгаа. Гэхдээ алив улсын эрх баригчдын эсрэг ард түмнийг нь , ард түмнийх нь эсрэг дарангуйлагчдыг нь турхирч, цэрэг зэвсэг, нууц алба, зэвсэгт дайчдаар туслах нь  ёсзүйн хувьд, олон улсын эрх зүйн хүрээнд ямар байдаг юм бол.
Бүх дэлхийд социализм, коммунизм байгуулах гэж ЗХУ үеийн үед улс орон бүрт төр засаг, ард иргэдийнх нь дунд яс хаян иргэний дайн өдүүлж ирсэн асар баян туршлагатай. Монголд, дундад Азид, латин америкт гээд..... Ингэснээрээ ч хөрш зэргэлдээ олон орноо эзлэн түрэмгийлж өөрийн харьяалалдаа авч байсан. 1920-иод онд Дундад Азийг, 1930-аад оны сүүлчээр Балти орчмын улсуудыг, дэлхийн хоёрдугаар дайны дараа зүүн Европын орнуудыг өөрийн болгож байсныг нь хүн төрөлхтөн мартаагүй.
Үүний тулд өөрийн дайсантайгаа нууцаар хуйвалдаж, үгсэн тохирч баруун зүүнээр наймаа хийж байсан нь ч өнөөдөр түүхийн шарласан хууданаас ил болсоор байгаа.
Ийнхүү Орос улс, ЗХУ хэдэн үеийн туршид хөрш зэргэлдээ улс орнуудаа эзлэн түрэмгийлж ирсэн дарангуйлагч болохыг  түүх мартаагүй.

Эх орончдоо хядаж байсан Орос өнөөдөр урвагчдыг шүтэж байна

Украин улсын ард иргэдийн төлөө хэмээн тангараг өргөж байсан ерөнхийлөгч Виктор Янукович гэдэг хүн энэ тангаргаасаа няцан улс орон ард түмнээ хаян зугтаахад хэн өмөг түшиг болон нөмөр нөөлөгтөө авав. В.В.Путин тэргүүтэй ОХУ. Өнөөдөр улс орон нь тарж бутарч, сүйрч байхад тэр хүн ОХУ-д орогночихоод, хэдэн тэрбумын үнээр харш аваад хааяа нэг гарч ирж Хэвлэлийн бага хурал хийж шүүмжилчихээд сууж байна. Улс орон ард түмнээсээ урвасан тэр урвагчийг хэн тэжээж, ивээж, хайрлаж  энхрийлж байна. Зөвхөн ОХУ, ерөнхийлөгч В.В. Путин.
Украины тусгай хүчний “Беркут” албанд байж барууныг, Европын холбоог баримтлах гэсэн ард иргэдийн жагсаалыг, энэ эрмэлзлийн хүчинд гарч ирсэн эрх баригчдаа эсэргүүцэн буу зэвсэг, бороохой барин түрэмгийлж байсан хуучин Украины, өөрөөр хэлбэл эх орноо хаян зугтааж Орост орогнож байгаа Виктор Януковичийн гар хөл болж байсан тусгай хүчний “Беркут”-ын дайчид ОХУ-ын “ОМОН” хүчинд элсэн тангараг өргөж байна. Тэд бүр цол тэмдэг аван ОХУ-д үнэнчээ илэрхийлж байх юм.
Уг нь тэд өчигдөр Украин улсад үнэнч байна гэж тангараг өргөсөн байх л даа. Крымын прокурор гэнэ үү, Наталья Поклонская гээд нэг шар үстэй хүүхэн тангараг өргөсөн эх орноосоо урваж ОХУ-д дагаар орсныхоо төлөө, оросын, Путины,  интернетийн бүр од, шүтээн болж байна. Цол тэмдэг, одон тэмдэг...юу юугаар ч шагнуулж байгаа юм.
Гэтэл Орос, Зөвлөлт чинь ямар гүрэн билээ. 1930-аад он, 1940-өөд он, Аугаа их Эх орны дайны үед яаж байлаа. Эх орныхоо төлөө  цусаа урсган тэмцье  гээд байсан эх орончид, генералууд, иргэний дайны баатрууд, цэрэг офицеруудаа урвагч яаж  алж хядаж, тамлан зовоож тарчилгаж байлаа даа. НКВД, СМЕРШ  гэдэг байгууллагууд хэдэн хүнийг яаж цөлж, тамлаж алж буудан хороож байсныг түүх мартаагүй. ГУЛАГ-ийн тухай аугаа их Солжницыны бичсэнийг мартах аргагүй.
Эх орончдоо урвагч хэмээн хядаж байсан Орос улс өнөөдөр хариас урваж ирсэн хүмүүсийг эх орончид хэмээн хүндэлж, цол, одон тэмдгээр мялааж байна. Энэ ямар юм бол.

Булаан эзлэх түрэмгийлэл нь хэр цар хүрээтэй юм бол

ОХУ-ын ерөнхийлөгч В.В.Путин Санкт–Пететрбургт болсон эдийн засгийн форумын үеэр гадаадын хэвлэл мэдээлийн агентлагуудын тэргүүнтэй уулзах үеэрээ “ОХУ газар нутгаа тэлэх, хөрш орнуудаа эзлэн түрэмгийлэх ямар ч бодолгүй” гэж мэдэгдсэн. Гэхдээ л Украинаас Крымыг нь элдэв аргаар өөртөө нэгтгэчихлээ. Одоо Донецк, Луганск мужуудад орос гаралтай иргэдийг турхиран салан тусгаарлах үзлийг нь дэвэргэсээр байна. Цаашид молдав, румыны хэсгийг ч санаархаж байж мэдэх.
Ер нь украинаас оросууд нэг сургамж гэх юм уу, шинэ санаа төрсөн гэж болох нь . Орос хэлтэй иргэдээ турхирч байгаад тухайн улс орныг дотроос нь үймүүлэн аажмаар орос иргэдээ хамгаалж байгаа нэрийн дор хагалан бутаргаж өөрийн мэдэлдээ газар нутгийг нь булаан эзлэх бодлого газар авахыг үгүйсгэхгүй.
Зөвлөлт засгийн үед эзлэн түрэмгийлж, ард иргэдийг нь аажим аажмаар оросчилж уусгасан ийм орон лавтай 15 байгаа. Өөрөөр хэлбэл хуучин ЗХУ-ын, аугаа их Зөвлөлт Социалист бүгд найрамдах холбоот улсын  бүрэлдхүүнд байж орос иргэд суурьшсан, орос хэлтэй иргэд бүхий орон 15 бий гэсэн үг. Энэ бүхэн рүү аугаа их ОХУ-ын, Путины гар сунахыг үгүйсгэхгүй. Магадгүй яг Украин руу сунгасан шиг.
Дэлхий даяаршиж байна. Олон улс орон тусгаар тогтнож  салж оршин тогтнож, зарим нь нийлж нэгдэж байна.
Энэ үйл явцыг далимдуулан ОХУ гэдэг том гүрэн  хөрш зэргэлдээ улс орнуудаа эзлэн түрэмгийлэх, өөртөө нэгтгэхийн тулд дарангуйлагч эрх баригчдыг нь, салан тусгаарлагчдыг нь, шашны, болон угсаа гарлыг нь ашиглан улайрсаар байна.
Том гүрний бодлого ямагт л том, түрэмгий байдаг.
Монгол Улсыг тусгаар тогтнох, үүнийгээ дэлхий нийтэд зарлах гэж  байхад 1911 онд Хаант Орос ч, 1921 онд  Зөвлөлт Орос ч ямагт чагт тээг тавьсаар ирснийг түүх мартаагүй л байгаа. Асар их баялагтай Монгол орон ч энэ их дээрэнгүй гүрний  хараанд байхыг хэн үгүйсгэх юм бэ.