Украйнд болж байгаа хэрэг явдалтай холбоотойгоор Өрнөдийн орнууд Оросын эсрэг олон тооны хориг арга хэмжээ авч байна. Хориг арга хэмжээний нөлөөг илүү хүчтэй болгохын тулд Оросын эдийн засгийн гол суурь болж байгаа олборлох салбар руу анхаарал хандуулах болж. Гэхдээ Оросын олборлогчдын бүтээгдэхүүнийг худалдан авахыг хориглох нь эргээд өөрсдөд нь тун таагүй байдал үүсгэнэ. Жишээлэхэд, дэлхийн хэмжээнд онгоц үйлдвэрлэлээр тэргүүлэгч компаниудын нэг “Airbus” Оросоос өөр газраас титан худалдан авах боломжийг судлах ажлын баг байгуулсан байна. Титан нь хамгийн бөх бат металын нэг болохоор онгоцыг хөөрөх ба газардахад голлох үүрэг гүйцэтгэдэг дугуйн системд маш ихээр ашиглагддаг. Оросын “ВСМПО-АВИСМА” компани нь “Airbus”-ын титаны хэрэгцээний 60 хувийг дангаар хангадаг. Европын холбоо Оросын эсрэг эдийн засгийн хориг арга хэмжээ авахдаа “ВСМПО-АВИСМА” компанийг оруулбал “Airbus” компани нь дугуйн систем үйлдвэрлэх титангүй болж, үйлдвэрлэл нь зогсохдоо тулна. Иймд эдийн засгийн хориг арга хэмжээ авах улс төрийн шийдвэр гарахаас өмнө титаны өөр нийлүүлэгч олохоор хайгуул эхэлсэн байна.
Оросын “ВСМПО-АВИСМА” компани нь титаны цувимал ба хэвлэмэл эдлэлийг 2020 он хүртэл “Airbus” компанид нийлүүлэх гэрээг тэртээ 2009 онд байгуулан ажиллаж байгаа аж. 2013 оны байдлаар энэ компанийн ашиг 14 хувиар нэмэгдэн 1,612 тэрбум ам.долларт хүрчээ.
