АНУ-ын Холбооны мөрдөх товчоо радио удирдлагатай онгоц ашиглан цуврал алан хядах ажиллагаа хийхээр зэхэж байсан Марокко гаралтай 27 настай залууг баривчилсан тухай “CBS” телевиз мэдээллээ. Яг ямар байгууламж руу алан хядах дайралт хийх гэж байсныг эрх баригчид тодруулаагүй ч мэдээллийн хэрэгслүүд Коннектикут мужид байрладаг холбооны Засгийн газрын мэдлийн байр гэжээ.
Алан хядах ажиллагаанд бэлдэж байсан Эль Мехди Семлали Фахти гэгч Мөрдөх товчооны нууц ажилтанд өөрийн төлөвлөгөөний талаар ярьсны дараа ийнхүү баригджээ.
Мөрдөх товчооны нууц ажилтанд ярихдаа Фахти алан хядах ажиллагаа явуулахад шаардлагатай бүх техник хэрэгсэл, тэсрэх бодисыг Мексикийн хил орчмоос худалдан авна, шаардлагатай хөрөнгийг нууцаар хар тамхи зарж олох тухайгаа дэлгэрэнгүй өгүүлсэн аж.
Энэ хэргийг хариуцсан шүүгч нь улсын яллагчдын хүсэлтийг ёсоор болгож барьцаалан суллагдах боломжгүйгээр түр хорих тушаал гаргаж. Мөн Фахтийг шүүхээс алан хядах ажиллагаа бэлдсэн төдийгүй цагаачлалын горимыг зөрчиж, оюутны визийн хугацаа дууссаны дараа долоон жилийн турш Америкт хууль бусаар амьдарсан гэж буруутгажээ.
