Малайзын Куала Лампураас Бээжинг зорин энэ сарын 8-ны өдөр нислэгт гарснаас хойш 17 хоног сураггүй байсны эцэст осолдсон гэдэг нь тодорхой болсон онгоцонд ямар хүмүүс сууж явав? Сэтгэл түгшээсэн 20 шахам хоногийн дараа 227 зорчигч, нисэх багийн 12 хүнээс амьд байх найдвар үгүй гэсэн зүрх зүсэм мэдээг ар гэрийнхэнд нь хүргээд удаагүй байна. Тэд хайртай эцэг эхийгээ, хүүгээ, охиноо, ах, дүүгээ хүлээж байсан ч эцэст нь гашуудлын мэдээ сонслоо.
14 улс орны 227 зорчигчийн дийлэнх нь буюу 153 нь хятад, 38 нь малайз, долоо нь индонез, зургаа нь австрали, тав нь энэтхэг, дөрөв нь франц, гурав нь америкийн иргэн байжээ. Мөн Шинэ Зеланд, Украйн, Канад, Ираны тус бүр хоёр иргэн, Тайвань, Орос, Нидерландын нэг, нэг иргэн явж байжээ.
Шинэ амьдрал хайсан залуус
Онгоц алга болсны дараах эхний хэдэн өдөр хуурамч паспортоос болж онгоц осолдуулсан байж болзошгүй хэмээн сэрдэгдэж байсан хоёр иран залуу үнэн хэрэгтээ Европт шинэ амьдрал эхлүүлэхээр эх орноосоо цагаачлан гарсан хүмүүс байсан. Тэд 2010 онд хулгайлагдсан Итали, Австрийн иргэдийн паспорт ашиглан, Европт хүрэх гэж байжээ. Иранаас гараад Малайзаар дамжин, Бээжинд хүрээд цааш Европт очих гэж байсан энэ хоёр залуу замдаа осолдоогүй бол бүхнийг шинээр эхлэхээр төлөвлөж байжээ. 18 настай Пура Нур Мухаммед Мердад гэхэд Германд байгаа ээж дээрээ очихын тулд хол зам туулахаар дөнгөж талдаа ороод байжээ. Тэрээр Бээжинд очсоныхоо дараа Амстердамаар дамжаад, Франкфуртэд хүрэх гэж байж. Онгоцонд суухаас 14 хоногийн өмнө Иранаас гарсан тэрээр Куала Лампурт ирээд маш сайхан байгаагаа Facebook хуудсаараа найзуудтайгаа ярьж байжээ.
Шинэ ажилдаа орохоор явсан инженер
Хятадын Циньхуа, Кэмбриж гээд нэр хүндтэй их сургуулиудад боловсрол эзэмшсэн, гялалзсан ирээдүйтэй шинэхэн инженер залуу Бээжинд саяхан ажилтай болоод, тэнд суурьшихаар Хятадын нийслэлийг зорьж явжээ. Ли Ючен хэмээх энэ залуу геотехникийн маш сайхан ажилд орж, ойр тойрныхон нь их баяртай байжээ. Тэрээр ажил амьдрал нь ид цэцэглэж эхэлсэн насандаа, гэрлээд удаагүй залуухан эхнэрээ орхиод Бээжин рүү явж байжээ.
Каллиграфын нэгэн үеийн уран бүтээлчид
Хятадын каллиграфын урлагийн нэгэн үеийн урдаа барьдаг 24 уран бүтээлч, туслах таван хүний хамт Куала Лампурт үзэсгэлэнгээ гаргачихаад гэр рүүгээ буцаж явжээ. Тэр дунд Хятад, Британи, АНУ-ын урлагийн институтын гаргасан толь бичигт уран бүтээл нь зүй ёсоор багтдаг 79 настай Лоу Баотан, 73 настай Жао Жао Фан гээд нэртэй каллиграфчид байжээ.
Хөвгүүд рүүгээ очиж явсан эцэг эх
Энэтхэгийн сайд асан Мухержигийн ач хүү Муктеш Мухержи эхнэрийн хамт Бээжинд байгаа хоёр хүү рүүгээ буцаж явжээ. Канадын “XCoal” компанид ажилладаг Мухержи эхнэртэйгээ хамт Вьетнамд очиж амарчихаад харьж явсан байна. 40 орчим насны хоёр хос бага насны хөвгүүдтэй ажээ. Мухержигийн өвөө 1970 онд мөн онгоцны ослоор амь үрэгдсэн юм байна.
Бал сараа тэмдэглэж явсан хос
Разаман Замани, Норли Акмар Хамид хэмээх шинэхэн хос удаан хүлээсэн бал сараа тэмдэглэхээр Бээжин рүү нисчээ. Тэд 2012 онд хуримаа хийсэн ч эхнэр нь хүүхдээ дутуу төрүүлснээс бал сараа хойшлуулсаар энэ хүрсэн байж. Тэд хамгийн анх удаа онгоцонд сууж үзсэн нь энэ байсан хэмээн ар гэрийнхэн нь ярьж байна.
Монголыг зорьж явсан Шинэ Зеланд эр
Филипп Вүүд бол онгоцонд явсан гурван америк хүний нэг юм. Тэрээр IBM компанийн салбарын гүйцэтгэх захирал байсан бөгөөд аялах дуртай нэгэн байжээ.Филипп Куала Лампурт суурьшиж, шинэ ажлаа хүлээн авахаас өмнө Бээжин орчихоод ирэх гэж онгоцонд суусан байж. Тэрээр АНУ-д амьдардаг хоёр хүүдээ Малайзад сайхан байна хэмээн ярьж байжээ. Филипп Вүүдтэй адил шинэ ажлаа эхлэхээр явж байсан өөр нэг зорчигч бол Австралиас Монголыг зорьж явсан Пол Вийкс юм. Монголд уул уурхайн төсөлд ажиллахаар болсон тэрээр онгоцонд суухаас өмнөхөн ирээдүйг зөгнөх мэт цаг, бөгжөө эхнэр, хоёр хүүдээ үлдээгээд хэрэв өөрт нь ямар нэг зүйл тохиолдвол түрүүлж гэрлэсэн хүүдээ бөгжийг нь, хоёр дахь хүүдээ цагийг нь өгөөрэй гэж захижээ.
Найзууд
MH 370 дугаар нислэгт олон гэр бүлээс гадна, найзууд явж байжээ. Жу Кун хэмээх тулааны урлагийн мэргэжилтэн , 35 настай залуу өөрийн найз Дин Лижунтэй хамт онгоцонд суусан байж. Жүжигчин Жет Лигийн зарим кинонд орлон тоглогчоор ажиллаж байсан Жу Кун Малайзад бас нэгэн киноны тулааны урлагийн хөдөлгөөнийг дэглэх ажлаар ирээд буцаж байсан бол Дин Лижун Малайзад жил гаруй барилга дээр ажиллаж байгаад гэртээ харьж явж. Мөн онгоцонд Балба руу аялчихаад буцаж явсан, өндөр настай есөн найз хамт явцгаасан байна.
