Австралийн хилийн аюулгүйн албаныхан хиймэл дагуулын зургаар Малайзын алга болсон онгоцны хэсэг байж болзошгүй хоёр ч зүйл олж харсан байна. Хиймэл дагуулд харагдсан энэ хоёр зүйл нь Австралийн Перт хотоос баруун өмнөд зүгт 2500 километрийн зайд байгаа аж. Эрлийн онгоцуудыг тийшээ илгээгээд байгаа бөгөөд онгоцны хэсэг мөн эсэхийг одоогоор тогтоогоогүй байгаа юм. Гэхдээ ажиглагдсан зүйлийн хэмжээ /24 метр орчим/-нээс харвал онгоцны нэг хэсэг байж болно хэмээн мэргэжилтнүүд үзэж байна.
Австралийн Ерөнхий сайд Тони Эббот парламентын хуралдааны үеэр энэ тухай олон нийтэд мэдэгдсэн ч энэ нь онгоцыг олсон гэсэн үг биш, эрлийн багийнхан очиж үзэж, дүн шинжилгээ хийсний дараа баталгаатай эсэхийг мэднэ гэжээ. Хиймэл дагуулд тэмдэглэгдсэн газар руу Австрали, Шинэ Зеланд, АНУ-ын онгоцууд очиж яваа аж. 
Малайзын сураггүй болсон онгоцыг эрэн хайх ажилд 26 улс орон оролцож байгаагаас Австрали хэд хоногийн өмнөөс хамрагдаж эхэлсэн юм.
