Дэлхийн хамгийн баян хүн Билл Гейтс одоогийн байдлаар хурааж хуримтлуулаад байгаа 76 тэрбум ам.долларын хөрөнгөнөөсөө гурван хүүхэддээ өвлүүлэхгүй хэмээн Канадад болсон TED чуулганы үеэр ярьжээ. Тэрээр эхнэр Мелинда Гейтсийн хамт үр хүүхдээ хэрхэн өсгөж хүмүүжүүлэх талаар лекц уншихдаа өөрийнхөө хүүхдүүдэд өв хөрөнгө үлдээхийн оронд боловсрол эзэмшүүлэхийг эрхэмлэсэн гэдгээ хэлээд тэд эцэг эхийнхээ хөрөнгөнд найдах биш, өөрсдийнхөө чадварт итгэх ёстой хэмээн үздэгээ хэлсэн байна. Хэдийгээр тэдний хүүхдүүд дэлхийн хамгийн баян хүний гэр бүлд өсч торнисон ч гэлээ олж авсан боловсрол мэдлэг дээрээ үндэслэн амьдралаа босгох чадвартай болж, хамгийн гол нь хийж буй ажил мэргэжил нь утга учиртай, чухал гэдгийг ойлгож ухаараасай гэж Билл Гейтс хүсдэг гэнэ.
Билл Гейтс мөнгө хөрөнгө өвлүүлэхгүй гэдгээ хүүхдүүддээ аль хэдийнэ хэлж ойлгуулсан бөгөөд Танзани мэтийн Африкийн орнууд руу ядууст туслахаар явахдаа хүүхдүүдээ ч бас хамт авч явдаг учраас тэд эцэг эхийнхээ шийдвэрийг ойлгож хүндэтгэдэг аж. 
Сүүлийн 10-аад жил дэлхийн тэргүүн баячуудын эгнээнд байнга бичигдэж буй Билл Гейтс “Giving Pledge” хэмээх уриалгад тэрбумтан найз Уоррен Баффетын хамт нэгдээд буй. Энэ уриалгад нэгдэхийн тулд нийт хөрөнгийнхөө талаас багагүй хувийг бусдын сайн сайхны төлөө зориулахаа амладаг бөгөөд Билл Гейтстэй эн тэнцэхүйц хөрөнгөтэй Уоррен Баффет гэхэд нийт хөрөнгийнхөө 98 хувийг бусдад хандивлана гэж мэдэгдсэн юм.
