Тайландад Засгийн газрын тэргүүнээ огцрохыг шаардаж эхэлсэн эсэргүүцлийн жагсаал 26-ны шөнө хурцдаж, үл мэдэгдэх этгээд галт зэвсэг хэрэглэн буудаж эхэлснээр гудамжны тулаан болж хувирсан байна. Жагсагчид болон хууль сахиулагчдын дунд болсон буудалцаан нэлээд удаан үргэлжилж цэргийнхэн галаа зогсоосноор арай гэж намжжээ. Энэ үеэр таван хүн шархадсан гэж мэдээлж байна. Жагсагчдын байрлал руу дайрсан хүмүүс галт зэвсэг, гар хийцийн гранат, гранат шидэгч ашигласан бол хууль сахиулагчид бас галт зэвсгээр зэвсэглэсэн байжээ.
Төрийн байгууллагууд, Авлигатай тэмцэх үндэсний газар, Сонгуулийн хороо зэргийн албан байрыг тусгай хүчнийхэн хамгаалж байна. Авлигатай тэмцэх үндэсний газар энэ сарын 27-нд Ерөнхий сайд Йинглак Чинаватыг албан үүрэгтээ хариуцлагагүй хандсан хэмээн буруутгахаар төлөвлөж байгаа юм.
Өнгөрсөн хугацаанд жагсагчид, хууль сахиулагчдын сөргөлдөөний улмаас бэртэж гэмтсэн хүний тоо 23-т хүрсний дотор таван настай охин өртөж эмнэлэгт очоод нас барсан аж.
